環亞機場貴賓候機室 Plaza Premium Lounge (West) ：宵遙快活

「環亞機場貴賓室」非第一次到訪，以往搭廉航、坐晨早機或凌晨機，都會入去食啲嘢先上機，爭取晌機上休息。但以前就多數喺嚟東翼嘅「環亞」（一號客運大樓離港層近1號閘口），但今次嘅大旅行喺凌晨機，一於預早食完嘢上機大覺瞓，就到訪西翼嘅「環亞」（一號客運大樓離港層近40號閘口）。

呢個候機室都幾大，間開好多區，但太多遊客就唔太方便周圍影，只喺晌其中一個區域。

大家入到嚟都志在喺食番餐，甚少喺話嚟抖吓，所以，仲有咩設施就唔講，一於直接講有咩食。近入門口就有水吧及雪櫃，果汁、汽水、咖啡、紅茶、樽裝水……等等冷熱飲品供應，睇見啲職員密密手補貨，此外，仲有啲生果添。

入少少，就晌大雪櫃旁，喺啲曲奇、糖果、三文治同烚蛋。

再隔離喺一大堆熱盤，如點心、粉麵、咖喱魚蛋、炒雜菜……等等。

最入嘅位置喺開放式廚房，先有一組沙律吧，款式當然唔可以跟平常去酒店食自助餐時比，但三數款夠晒砌一碟出嚟啦，仲有以配件迷你薄餅嘛！另一邊就喺「馳名」港式魚蛋粉及牛丸米，睇見唔少乘客都會整番碗。而調味料就在一旁，自由取用。

沙律、薄餅

話雖呢餐喺宵夜，但都要食飽飽先嚟上機，因為唔食第一餐飛機餐，真喺要等近十粒鐘後先有第二餐食。先嚟一大碟沙律開吓胃，有小弟心水嘅紅菜頭，自然食多幾嚿。今次因夜機，咖啡就唔好喇，罐裝凍檸茶配件薄餅，感覺唔錯吖。

魚蛋牛丸河

香港人，點都要食番碗港式粉麵填肚，因為打後落嚟兩星期，有錢都未必食得到囉。啲河粉確喺幾滑溜，配多點金蒜、肉燥，寧舍好味。而無論魚蛋、魚片頭或牛丸，都有一定質素，唔喺啲平價貨，怪唔得咁多人支持。

友人話呢度有部即製班戟機，唔知喺咪近深宵時段，被收起咗，故未能以甜點作結。不過，免費嘢，都無要求太多，而整體味道算喺唔錯。我哋嘅登機閘就喺41號，食完個宵夜，睇住時間慢慢行過隔離準備登機，一於拋低工作煩擾，消遙快活番兩星期。

個人評分
味道：7/10
環境：8/10
服務：8/10
抵食：7/10
平均每人消費：HK$0

餐廳資料：
環亞機場貴賓候機室 Plaza Premium Lounge (West)
赤鱲角香港國際機場一號客運大樓6樓離港層東大堂 (禁區)
2261 2612