麥當勞 McDonald's：麥盡其用

咪睇小弟嘅食評好似不時都食好嘢，其實，平貴都會試吓，不過，有時又唔喺食過乜都寫而已。近排見「麥記」推出兩款新包：宮崎風味南蠻炸雞漢堡及金澤風味黑咖喱吉列豬排漢堡，仲賣廣告賣到鋪天蓋地咁，所以，搵次食晏試試佢。

小弟今次想試嘅喺前者，因為二年前去過一轉九洲嘅宮崎同鹿兒島，晌當地食過好幾次南蠻炸雞，所以，有種想重溫那些年回味嘅感覺，當然，心裡有數，「麥記」出品跟食地道嘅南蠻炸雞就梗喺有啲落差啦。

個宮崎風味南蠻炸雞漢堡嘅包裝好和風，我本身事前就無刻意番意嗰個廣告，所以，對個包都無咩具體認知。一拿上手，爆晒汁，可能落醬太多，瀉晒出嚟，而件炸雞塊幾厚身，嫩就唔嫩滑架喇，但亦唔叫嚡（其實應該都喺跟平常食嘅麥香雞嗰件雞塊一樣），沾滿酸酸甜甜嘅醬汁，除椰菜絲、洋蔥絲，上面仲加有啲蛋沙律，整體味道確喺幾唔錯。

薯條換咗沙律杯，無咩好補充，反而杯凍檸茶想講兩句，茶色比較淡，雖然有3塊大檸檬片，但咁大杯就唔多啱比例，故此飲起嚟檸檬味薄啲囉。

正所謂好又一餐，唔好又一餐，今餐？都OK啦，「麥記」不時推出新包款，將唔同地方嘅食材、菜式都物盡其用，進行「二次創作」成為新包款，雖然好多人都話「麥記」喺賣垃圾食物，咁佢哋賣「垃圾」得嚟，都入咗好多心思嘅。

個人評分
味道：7/10
環境：6/10
服務：6/10
抵食：7/10
平均每人消費：HK$40

餐廳資料：
麥當勞 McDonald's
中環皇后大道中37號余道生大廈地庫
2526 3770