孟買廚房 Bombay Kitchen：孟有引力

利用香料做菜，我就覺得印度比其他國家勝一籌喇，尤其佢哋啲咖喱，話我有偏頗都喺咁講架啦，真喺寧舍唔同，特別有層次。好似今晚同個好鍾意食印度嘢嘅朋友嚟到九龍城嘅「孟買廚房」，細嚐印度菜嘅滋味。

依家去啲印度餐廳，都唔再喺裝修傳傳統統咁，大多數都裝潢得好型格，唔講唔知佢喺賣印度菜添！

走入店內，因喺相連兩個鋪位，所以，地方唔細，枱櫈亦排得鬆動，再配以弧形椅背嘅梳化椅，非常舒服好坐。

通常印度餐廳都有較多印度藉侍應，是晚所見，兩個侍應都喺本地人，而店主雖然喺印度人（照睇樣認為喺），但佢啲廣東話隨時流利過你同我呀，故此，點菜就唔使怕雞同鴨講，相信佢哋嘅客人對象可以以本地人為主，而且，餐牌都喺中英對照，手指指都唔怕啦！

芒果酸奶（Mango Lassi） $30

嚟親印度餐廳，小弟真喺鍾情芒果酸奶，大大杯都只喺賣$30，比一般賣$35-$40認真抵飲，以鮮芒果肉跟乳酪打成，雖然芒果味未叫做好強勁，但香甜得嚟有點點乳酪酸香味，清甜醒神。

扁豆湯（Lentil Soup） $30

友人就鍾意飲啲熱湯，所以，揀咗款扁豆湯，但佢話唔似一般豆蓉湯咁杰身，入口微辣，除有啲豆味，仲飲落似喺加咗黃薑，感覺唔錯。

腰果汁串燒雞（Chicken Malai Kebab）$95

比起天多尼或瑪沙拉，依一款串燒雞味道比較清淡啲，因為用上印式奶油（Malai），友人話中文譯為「腰果汁」應該喺譯錯，加上食晒啲雞都唔覺有腰果味，所以，更敢肯定翻譯有誤，幸而，啲雞幾嫩滑，唧埋檸汁就更覺清新。

乳酪濃汁牛腩（Brisket Korma） $90

店主好熱情四圍招呼啲客，更介紹個乳酪濃汁喺由乳酪、奶油、果仁、咖喱製成，質感較濃卻好幼滑，香濃中帶點甜味，而啲牛腩已炆到好腍，所以，我哋都覺得好好食。

乾果烤餅（Kashmiri Naan） $25

點得個乳酪濃汁，就梗喺要叫一客印度烤餅嚟做配搭啦，烤餅有超過10款選擇，如，都喺$15-$25，呢一款乾果烤餅，餅內堅混入乾果，而且烘得幾好，柔韌有咬口，喺配咖喱嘅好朋友，仲要一客有成6大件，抵食。

北印度式秋葵（Bhindi Masala） $70

諗住點一客蔬菜類菜式平衡吓，見呢款「北印度式秋葵」好似幾特別咁，不過，真喺有啲瀨嘢，因為原來喺好鬼辣，事後再上網查番，有啲餐廳譯為「印式香辣秋葵」，咁譯就貼切好多，希望店主加番兩隻辣椒公仔晌餐牌度提醒吓啲客人啦。此外，碟秋葵個人亦覺得有輕微偏鹹，如改進吓會更好食。

簡簡單單點咗幾款食物，感覺都唔錯，而且，定價都好親民，可以講有少少街坊價，兼且最意外喺唔收加一服務費添，而兩位侍應及店主都好落力招呼，值得俾個讚佢哋。

個人評分
味道：7/10
環境：8/10
服務：8/10
抵食：9/10
平均每人消費：HK$170

餐廳資料：
孟買廚房 Bombay kitchen
九龍城城南道72-74號地舖
2382 7798