富臨漁港囍臨門酒家 Foo Lum Fishman's Wharf Restaurant：步步糕陞

今年所食嘅第二底年糕，喺外父所送，富臨集團出品。原本外父送兩盒過嚟，一盒蘿蔔糕，一盒年糕，不過知舅仔對年糕麻麻，所以揀咗年糕，蘿蔔糕就留番俾佢食。不過，事後佢話要年糕好過，因為蘿蔔糕嘅臘肉、臘腸勁肥喎！

富臨啲年糕比較大個，又重秤，因為盒底無成份，無淨重……等相關資料，只喺一拎上手估佢大概有成兩斤左右重，而睇埋色澤都幾對辦，至於好唔好食，試過先知。

試過晌親戚屋企食年糕，佢哋喜歡「齋煎」，煎完仲要一塊疊一塊，夾時黐到實，好難搞。我就喜歡沾蛋漿煎，薄薄一層就夠嘞，唔使搞到啲年糕黐實晒就可以嘞；仲要慢火細烘，令到啲年糕軟得嚟仍然帶份煙韌感。講到富臨年糕嘅質素，味道上稍稍偏甜，但有淡淡椰汁香味，香糯軟綿，有點韌勁。

相信好多人晌過年期間都食咗唔少糕，小弟今年食到嘅大多數都喺比較傳統啲，但無論傳統定新派，但願人人讀書、工作都步步高陞，富臨各家！

個人評分
味道：6/10
環境：6/10
服務：6/10
抵食：7/10
平均每人消費：HK$0（禮物）

餐廳資料：
富臨漁港囍臨門酒家 Foo Lum Fishman's Wharf Restaurant
荃灣眾安街68號荃灣城市中心一期6樓
2409 0883