入夜後嘅謝斐道都比較靜，行到馬師道交界，Corner Burger & Bar寧舍突出，除咗射燈嘅燈光之外，紅磚牆嘅外觀跟周圍石屎大廈好唔同。其實，餐廳集漢堡包店與酒吧一身，所以，內部裝修都以高腳枱櫈為主，掛有不斷播映體育節目嘅大平板電視，喺飲酒、嘆小食、傾吓偈嘅區域；然而，餐廳最入嘅地方放置咗梳化椅及餐枱，更掛上唔少美式鐵版畫，喺較靜，又方便用餐嘅地方。
近門口酒吧位
近門口酒吧位
餐廳較入嘅用餐區
雖然試菜菜式一早已由餐廳定下，都喺數款招牌菜式，但都想睇睇整體有咩選擇。原來雖掛名賣漢堡，原來仍有唔少其他類別菜式，如沙律、意粉、焗薯、惹味小食……等等。當然，叫得自己做酒吧，酒精類飲品不可少，由啤酒、紅白酒、威士忌以至干邑、雞尾酒都一一有供應；因為都有供應正餐食品，所以，咖啡、茶、汽水、果汁都有。
意粉及沙律類
小食及焗薯類
飲品餐單
最可惜今日仍有少少抱恙，加上天氣又實在太凍，一向少飲酒嘅我，故然滴酒不沾，連帶想飲杯咖啡或果汁也不行，乖乖以暖水侍候。而同行友人Ivan兄本身都有飲開幾杯，原來亦都小病初癒，真喺同病相憐。
Italian Tomato Salad with Mozzarella Cheese $88
估唔到並無以餐廳自居，沙律方面仍有成5款選擇，平嘅有凱旋沙律、煙三文沙律，貴嘅又有波士頓龍蝦沙律，要平要貴，悉隨尊便。而今晚試到嘅喺意大利蕃茄水牛芝士沙律，簡單沙律菜墊底，中間原舊水牛芝士角切，落手非常大方，側傍裙邊有數片意大利蕃茄，單睇賣相，製作認真，用料無欺場。沙律菜十分鮮爽，蕃茄頗清甜，煙韌而清淡嘅水牛芝士較常食到嘅稍為實心，少份綿柔，不過，淋上嘅葡萄醋入口厚身醇香，為道沙律額外加分，問過侍應，原來葡萄醋買番嚟時再經調校及煮過，有時廚師嘅功夫就只有反映晌依啲細節位之上。
Buffalo Wings $56
水牛雞翼喺美式餐廳一道幾出名嘅小食，晌網上打「水牛雞翼」4字，就好易搵到佢嘅起源，不過，想重點講講，依款雞翼嘅特點就喺以酸辣醬汁為雞翼調味，食落香脆可口，酸辣過癮。唔同廚師有唔同嘅「酸辣」配方，做法都各異，眼前所見，一客6件嘅水牛雞翼，有別傳統，酸辣醬汁另上，據講喺怕有啲客人唔食得太辣，如讓客人自己沾點，試過先自行再蘸多蘸少，比較有彈性啲。講番啲雞翼，本身炸得極香脆，外皮咔嚓應聲裂開，而醬汁少酸微辣，無想像中咁勁，啱我依類唔食得太辣嘅人。老實講，個醬汁又確喺幾有少少中式辣醬嘅感覺。
Carbonara $72
單論意粉個質惑、醬汁個味道，依道卡邦尼意粉小弟就好滿意，意粉煮得有咬口，蛋黃忌廉汁做得好柔滑，而且落咗超重手巴馬芝士粉，芝士味勁濃，勁啱我呀；此外，煙肉唔肥，又有唔少磨菇，令整個意粉味道唔單調。可惜，食到尾就出現咗個問題，啲油沉晒底，唔喺咁理想，令到最尾嗰一、兩炷意粉油淋淋，喺美中不足之處。另外仲有兩款意粉：黑松露雞肉意粉及辣蕃茄醬意粉，有機會下次試試先得。
Cheese Burger $68
既然用上「Burger & Bar」，漢堡又點會失禮吖，翻翻餐牌，就見到足足有成16款漢堡，加2款三文治，漢堡以牛肉佔絕大多數，仲有蔬菜、豬、羊、雞及魚嘅漢堡，定價由$60至$168。
壓軸登場嘅芝士漢堡卒之出現，佢個呎碼真喺唔講得笑，無論一底一面嘅包身，以及內裡嘅牛肉，都厚身份量足。個包新鮮軟熟，有成吋厚嘅百份百安格斯牛肉，唔單鬆軟，而且肉味濃，富肉汁又帶點油香，再配以蕃茄、酸青瓜、車打芝士、羅馬生菜，加埋自家醬汁，真喺想一口過咬落去呀，不過個漢堡呎碼實在太大，都要分開嚟食，依然令人食得回味。
以份量及質素而言，店方取價唔貴，加上環境舒適，無論摸酒杯底，抑或跟友人食飯聚餐都OK。再次多謝店方邀請，希望菜式越做越好，讓客人唔單止飲得開心，仲食得開懷！
個人評分
味道：8/10
環境：8/10
服務：8/10
抵食：8/10
平均每人消費：HK$0（試食邀請）
味道：8/10
環境：8/10
服務：8/10
抵食：8/10
平均每人消費：HK$0（試食邀請）
餐廳資料：
Corner Burger & Bar
銅鑼灣馬師道1-5號及謝斐道348號保如大廈地下A-D舖
2297 3310
Corner Burger & Bar
銅鑼灣馬師道1-5號及謝斐道348號保如大廈地下A-D舖
2297 3310
沒有留言:
發佈留言