今次被安排坐到餐廳尾最入嘅6人枱，相對少騷擾，實在方便我哋幾個傾偈。雖然枱櫈排得有比較密集，幸好大部份都喺斯文客，唔似一啲街坊酒家咁粗聲粗氣，感覺唔太嘈；而佢啲梳化櫈亦較為小巧，無咁「掗拃」得嚟又坐得挺舒服；而精緻嘅餐具更喺美心中菜食府嘅標記，有湖水藍同棗紅色兩套，配黑白公私筷，讓人感覺多幾分氣派。
一如既往，未起筷先嚟杯功夫茶及泡菜小食（茗茶每位收$15，功夫茶就額外送嘅，而泡菜每碟收$26，我哋6個人收咗兩碟錢。）前者茶色清澈，醇厚甘涼；後者有青瓜、鹹酸菜、花生，集開胃、爽脆之感。功夫茶有健脾開胃、解酒除膩之用，所以潮庭飯前飯後都各自奉上一盤功夫茶，喺一份窩心嘅體貼。
話咗同老婆嚟食過，自然有心水菜式推介俾老友，加上上次好有興趣而未有機會試嘅菜式，以及少少風味小食，唔太難就敲定今晚嘅餸菜。
涼拌豬腳凍 $65
跟鎮江肴肉有啲異曲同工，入口冰涼清爽，而豬腳肉好軟腍，湯凍部份軟滑如啫喱，猶如骨膠原入口。
胡麻涼拌茄子 $65
用細條嘅茄子，令做出嚟外觀口徑一致，賣相好睇啲。食落微暖，質感綿綿，然則麻醬勁香濃，又有少少微酸。
太極海鮮羹 $138
太極羹有兩款，分別喺：雞蓉太極羹（$118）及太極海鮮羹（$138），當然唔介意食貴少少要後者啦。咩叫做先聲奪人，一睇個湯羹送上嚟就知嘞，一幅太極陰陽圖，綠色為菠菜蓉，配合含有帶子肉、蝦肉及魚肉嘅海鮮羹，湯羹味道鮮甜綿滑，濃郁嘅菠菜味又別具一格。
菠蘿醬燒蝦球 $204
依個喺上次想試嘅菜式，餐牌上標價$168，但無寫幾多粒，不過張相喺4件嚟，再問清楚店員確喺一客4件，所以，問問可唔可以加到6件，原來喺可以，仲只賣$204，即喺+$36多兩隻蝦球，抵喎！個賣相唔太花巧，但個蝦球絕對好食，蝦球既大粒，又有層薄薄脆漿，蝦肉極為鮮爽彈牙，清甜嘅菠蘿醬又唔會冚過蝦鮮味，值得一試嘅菜式。
香芋桃仁鴨方 $95
依個啱啱好一客6件，唔使煩多唔多加嘅問題。燒鴨件配芋蓉，混有花生粒（乜唔喺合桃仁？），喺燒鴨版嘅芋頭角，燒鴨油潤酥香，芋蓉非常粉香幼滑，外皮鬆脆不油，蘸海鮮醬食一流。而中間伴碟嘅炸紫蘇葉，入口比較油膩，似乎點綴作用多啲。
翡翠菊花石榴雞 $168
上一次食過感覺太好，所以喺今次「內定」嘅菜式，之前都擔心唔可以人人試到，多口一問，原來又喺可以額外再加，基本嘅份量喺一客4件，賣$108，依家加多兩件，都只不過加到$168。菊花石榴雞個名稱嘅由來，及其做法唔再多講，因為上次嘅食評都有分享。而今次再食，一樣做得精巧，煎蛋白外皮依然薄透有韌性，內餡嘅雞肉粒、蘿白粒、冬菇粒、冬筍粒、唐芹粒同樣刴得幼細無欺場，口感有層次，個玻璃雞湯茨，淡雅清甜，的確好睇好食！
沙茶牛肉炒粿條 $98
可能有少少慣性，最尾點都嗌個炒粉飯麵墊墊肚先安心大家食得夠飽。沙茶牛肉炒得既香又惹味，食落好腍滑，而炒粿條（河粉）濕濕淋淋，又軟軟滑滑，當中有蛋花、蔥花，味道唔單一，實在炒得唔錯。
另外，我哋順道慶祝吓，帶咗個美心蛋糕嚟，因為喺唔收切餅費（同喺美心集團嘅東海堂都唔收）。最欣賞喺唔收切餅費之外，仲好好招呼，換上新碟，又幫我哋分好6件，兼且切得夠平均。
我哋訂咗7:00pm枱，又無時限，一直傾到10:00pm先散，夠晒盡慶。連埋茶介、泡菜小食、加一，每人都喺$180左右，認真抵食。
個人評分
味道：8/10
環境：8/10
服務：8/10
抵食：8/10
平均每人消費：HK$180
味道：8/10
環境：8/10
服務：8/10
抵食：8/10
平均每人消費：HK$180
餐廳資料：
潮庭 Chiuchow Garden Restaurant
尖沙咀梳士巴利道3號星光行東翼2樓
2801 6899
潮庭 Chiuchow Garden Restaurant
尖沙咀梳士巴利道3號星光行東翼2樓
2801 6899
沒有留言:
發佈留言