最鍾意留意佢個開放式廚房，睇到一眾年青廚師嘅拼搏。
「黑板」餐牌一眼睇晒，湯麵、意粉、漢堡、咖喱、飯等等，以及出名嘅常餐，同埋其他輕食。
海鮮喇沙玻璃麵 $62
老婆都超鍾意食喇沙，所以二話不說就揀個海鮮喇沙玻璃麵。個喇沙湯底都幾辣下，但入口有椰香，惹味鮮濃。而海鮮料無欺場，有魷魚、帶子粒、青口、鮮蝦，份量足，同埋食材不賴，尤其啲魷魚同鮮蝦，前者柔軟鮮甜，後者非常彈牙，配菜仲有豆卜、四季豆，而個玻璃麵有少少似食紅薯粉，外表晶瑩透明，麵條質感富有韌勁。
扒鮮雜菌油醋汁扁意粉 $47
小弟就西化啲，又喜歡食意大利嘢，所以揀咗個扁意粉。雖然個扁意粉簡簡單單，但味道實在不俗，意粉煙韌有咬口，因以油醋汁拌過，味道帶少少酸，唔似忌廉汁一類，食落好輕怡、清爽；而扒鮮雜菌又唔喺單一種菇菌，有3幾種，仲有好多添，菌香馥郁，真喺幾得！
焦糖鮮奶咖啡 $13（跟餐價）
正價要$24一杯，凡點任何主食都可以用優惠價買杯餐飲，咁著數無理由唔要架。不過，被老婆話又喺「焦糖」，正吖嘛。杯焦糖鮮奶咖啡意外哋唔喺太甜，兼且質感幼滑，味道醇香，只加$13就有一杯，仲要有埋咁靚嘅拉花，完全超值。
何解標題為「生人霸死地」？事緣眾所周知，間餐廳一向好多人，尤其飯市時間，等位都預咗，但眼見一對男女食完晒嘢（應該只喺飲嘢），好聲好氣問佢哋會唔會坐得好耐，如果坐得耐就費事等佢依張枱嘛，點知個女都費事答你，出去買咗兜沙律放晌枱上唔打開，唔食，跟手一句話等緊朋友，咁我都吹妳唔漲，反正我又唔喺等你哋一張枱可以等。但故事未完，我哋已晌隔兩張枱度搵到空位，仲安座食緊嘢。點知嗰對男女見隔離枱走人，再霸多兩個位，被其他客人問到有無人坐就話有朋友嚟緊，咁事實上又喺，大概10分鐘後有多一位女生嚟到，仲同佢哋講食咗嘢，之後，3個人攤開啲旅遊書傾旅行嘢，頂！你幾個幫襯少少都奈你哋唔何，但又掗住啲位咁耐，仲唔知傾幾耐，自私到咁，不如去星光行地庫間麥記啦！
個人評分
味道：8/10
環境：7/10
服務：6/10
抵食：8/10
平均每人消費：HK$61
味道：8/10
環境：7/10
服務：6/10
抵食：8/10
平均每人消費：HK$61
餐廳資料：
Deli and Wine：
尖沙咀梳士巴利道10號香港文化中心餐廳大樓地下
2721 9866
Deli and Wine：
尖沙咀梳士巴利道10號香港文化中心餐廳大樓地下
2721 9866
沒有留言:
發佈留言