我哋真喺嚟得早，6:00pm喺完全唔使等位，但食完到8:00pm時段，門口企滿晒人，誇張少少講句，等𨋢都有啲困難。室內環境又喺一片阿拉伯風情，雖然位處旺角租金高昂地段，但估唔到枱櫈排得又唔算逼，地方都算得上闊落；而天花又掛有唔少別緻嘅吊燈，牆身又有啲手繪圖案，令人覺得少份拘束。
枱面張餐紙有個「Top 10」介紹，據知個白咖喱香茅豬扒飯晌店內確喺有啲名氣，不過，連個煙肉菠蘿鮮茄醬酥皮薄餅都喺，喺咪咁堅呀？結果，就從「Top 10」中揀咗其中4樣，再由屋企人晌主餐牌揀多幾款嘢食，見惠顧任何食品（$29或以上），都有飲品半價優惠，又無理由唔嗌埋嘢飲啫。
蒜蓉牛油雞翼 $36
一客4隻，啱啱好夠我哋分，唔使爭唔使搶。雞翼呎碼夠晒大件，外層炸得非常香脆，不過，似KFC啲炸雞喎，蒜蓉及牛油味都稍弱。
椒鹽脆豆腐 $29 / 4件，$45 / 8件
個椒鹽脆豆腐好得，豆腐食落先嚟一層薄薄嘅「脆皮」，跟住喺十分嫩滑嘅豆腐，椒鹽味又做得似樣，熱辣香口，意外咁好食。
北海道芝心餅 $41 / 2件，$23 / 1件
上次試過已覺得好食又有心思嘅小食，所以推介俾屋企人。芝心餅外層香脆，入口煙糯，內裡喺綿綿溜溜嘅北海道牛乳芝士，既香且滑，淡淡牛乳香，配合埋芝麻粒、紫菜碎，有層次，有口感，正！
煙肉菠蘿鮮茄醬酥皮薄餅 $32
知道細佬一向鍾意食薄餅，一口氣點咗兩個，因為知道依度嘅薄餅好細件，喺「６吋」厚批，相信我哋食得晒。個酥皮薄餅依然超鬆脆，煙肉亦落得唔少，可是菠蘿及鮮茄醬唔多突出，雖然，貴為「Top 10」，但食落唔錯嘅，都幾好味，只喺又唔可以話好太特別。
娘惹咖喱辣牛酥皮薄餅 $35
反而依個新推出嘅咖喱辣牛好食啲，其實已喺第二次食，特意介紹嘅，微辣惹味嘅娘惹牛肉，單單配襯絲絲溶掉嘅芝士，味道上已經好有驚喜，值得一食再食！
白咖喱香茅豬扒飯 $50
依個就真喺不負「Top 10」之名，雖然唔喺話好食到曉飛，但啲咖喱又確喺煮得香濃，又帶有淡淡椰香，少少辣，好有個性；而香茅豬扒亦夠晒入味，充滿香茅芳香，肉質又鬆軟，食得叫人滋味。
魚籽海鮮炒飯 $64
依個飯亦喺新產品，啲魚籽細細粒黐晌啲飯粒度，其實味道及口感都唔太突出，不過，個炒飯本身都幾好食，飯粒挺乾身，唔太油，又有唔少配料，如蝦仁、魷魚、魚肉，仲有隻煎荷包蛋，篤穿隻蛋，撈勻啲蛋漿仲好食。
上面都講過飲品有半價優惠，連一向多數餐飲只揀熱檸水嘅老婆，都揀番杯貴嘢。我就更加唔使講啦，有新嘢試新嘢，無新嘢都揀杯特別啲架啦。
鮮芒椰汁西米 $17（半價優惠）
鮮芒椰汁系列有5個選擇，可以拼啫喱、西米、仙草、紅豆、水晶芝麻，定價都喺$34。細妹揀嘅鮮芒椰汁西米，當然無餐牌張相咁靚，西米亦都似乎好少。
鮮芒椰汁仙草 $17（半價優惠）
小弟就揀鮮芒椰汁仙草，鮮芒果汁應該唔似百份百嘞，因為飲落滑到無渣無纖維，而椰奶欠奉，仙草（涼粉）又少得可憐，原價就真喺唔多抵飲，依家半價就勉強接受啦。
五穀杏仁 $16（半價優惠）
其實喺咩嚟？即喺杏霜加五穀，咁五穀又喺乜？即喺脆玄米粒、脆麥片、小麥胚芽、黃豆、原粒脆燕麥，自行將五穀倒入熱杏霜當中，好有貨真價實嘅感覺，味道有少少似啲即沖麥皮，但就有咬口好多。
凍檸賓 $11.5（半價優惠）
細佬要咗杯凍檸賓，如無意外，咁穩打穩紮嘅嘢飲，都應該無咩話題吧！
整體食物唔錯，夠使多元化，啲嘢細細份，又可以俾人試多啲，怪不得走時門口人山人海，最難得莫過於啱晒細佬口味啦！
個人評分
味道：8/10
環境：7/10
服務：7/10
抵食：9/10
平均每人消費：HK$96
味道：8/10
環境：7/10
服務：7/10
抵食：9/10
平均每人消費：HK$96
餐廳資料：
沙嗲王 Satay King
旺角彌敦道655號胡社生行4樓
3188 9161
沙嗲王 Satay King
旺角彌敦道655號胡社生行4樓
3188 9161
沒有留言:
發佈留言