香港會議展覽中心君爵廳 Chancellor Room：大學晚宴．氣派盡顯

早前因工作關係，應邀出席一個國內大學香港校友會所搞嘅晚宴，平時小弟都唔多喜歡依類場合，多數謝絕，今次赴約純為見識一下，晚宴設於香港會議展覽中心4/F嘅君爵廳。

偌大嘅宴會廳筵開20席，枱枱都以花為代號：向日葵、牡丹、海棠、杜鵑……，甚有雅意。而席間名人甚多，不過，都喺我識佢，佢唔識我嗰種。期間敬茶、敬酒、派片都成為指定動作，但小弟不好此道，乖乖晌位影相，搵手機略打食評。

是晚嘅宴會一共上10道菜，多款菜式都甚有睇頭，此外，枱上嘅餐具及擺設都甚有氣派。

晌如此高級嘅宴會廳進餐，當然唔使大家「起筷」，規格跟晌酒店內嘅中菜廳擺酒無異，每道菜都由專人分好再送上，所以，侍應們都要密密做。

鴻運乳豬拼盤

拼盤有乳豬件、海蜇、蒜泥青瓜、牛展、分蹄，乳豬香脆又唔肥，青瓜爽脆帶蒜香，牛展入味而微辣，其他嘅海蜇、分蹄就顯得普通啲，但本身口感、味道都唔差嘅。

碧綠金沙蝦丸

依道菜正，蝦丸唔單只彈牙，外層加咗鹹蛋黃，特別惹味；蜜糖豆既清甜，又爽脆，細心位喺去頭、去尾，又去邊，食起嚟完全無渣。

燕窩金雀羹

金雀羹其實喺將鷓鴣拆肉做成嘅肉羹，睇落成窩小粥咁，由於鷓鴣肉拆得好細碎，令人食起嚟好似食粥咁綿，而側旁嗰小碟燕窩，絕對喺「豪氣」、「派頭」嘅表現，整體而言，個金雀羹真喺好好食。

福袋蹄筋原隻鮑魚

初頭望到個鮑魚，何來蹄筋，原來晌鮑魚之下，福袋裡面。唔單鮑魚又腍又入味，蹄根亦都腍滑非常，連啲西蘭花都做得爽口，實在做得一絲不苟。

清蒸綠洲花尾龍躉

魚肉挺滑，肉質細嫩，最可惜唔知條花尾龍躉嘅真身喺點，送到上枱嘅已經喺分好一碗碗。

香蔥茗茶燻雞

飲宴多數都喺食炸子雞居多，但今晚以燻雞品客，燻雞做得上乘，肉嫩已經叫人食得稱心，加上雞肉帶有點點茶葉香，清香不俗，正！

金貝蛋白炒飯‧上湯水餃生麵

兩份單尾同時送上，仲要每款一整碗，一定食得你飽。炒飯做得出色，飯粒分明，配以金銀瑤柱絲，又多蛋白碎，清得嚟唔寡；至於個湯麵，麵條爽，湯頭清，少少魚鮮味，而水餃內嘅木耳、蝦肉同樣爽口好食。

生磨杏汁燉湘蓮海底椰

臨尾個糖水亦都無馬馬虎虎，杏味濃郁得嚟好清香，蓮子非常鬆化，甜度又啱啱好，超讚。

本應送上糖水嘅同時，就喺配精美小甜點，不過，由傍晚嘅接待酒會、主席致歡迎詞、嘉賓致詞、校友會匯報……等等，搞咗兩個幾鐘，比原先「開飯」嘅時間遲咗個幾鐘，我估大會怕賓客有啲餓，所以，就將個小甜點晌席前送上，喺笑口棗及豆沙煎埋仔嚟，抱歉相片欠奉，因為小弟以為只喺餐前小食。

個人評分
味道：9/10
環境：8/10
服務：8/10
抵食：7/10
平均每人消費：HK$0

餐廳資料：
香港會議展覽中心君爵廳 Chancellor Room
灣仔港灣道1號香港會議展覽中心4/F
2582 7813