聖安娜餅屋 Saint Honore Cake Shop：豈有紫理．分甘同味

跟幾個美孚坊街飯聚，順道賀生日，小弟嘅賀禮，就喺生日蛋糕一個，諗起都好耐無幫襯區內嘅聖安娜，就近近哋過去望一下。

近年感覺聖安娜無咁進取，出嘅蛋糕唔喺好多新款式，少咗推出新款蛋糕，轉款嘅時間亦較為長。不過，「全新推出」兼「季節限定」嘅「紫薯甘栗圓舞曲」，查實都仲未試過，故此，無乜點考慮就一於試吓依個嘞。

紫薯甘栗圓舞曲 $175

其實喺一個紫薯栗子慕絲蛋糕，面層以紫薯蓉及栗子蓉相間唧花，再加上朱古力片、開心果仁碎及杏仁片做裝飾；而糕心喺上下兩層海綿蛋糕，中間夾有紫薯慕絲及紫薯蓉，至於餅底喺朱古力酥底。題外話，聖安娜蛋糕盒啲設計，個人覺得麻麻，感覺有啲俗氣，不過，各花入各眼啦。

面層嘅紫薯蓉及栗子蓉的確做得幾幼滑，而且，味道清甜，水準不相伯仲，而朱古力酥底既薄且鬆脆；可惜喺中間嘅海綿蛋糕，自覺未夠鬆軟，而且，兩層海綿蛋糕中間嘅紫薯慕絲實在少得可憐。由於整個蛋糕都無忌廉，故部份朋友都好喜歡，貪佢感覺輕盈。

紫薯 x 甘栗系列，除咗「紫薯甘栗圓舞曲」，仲有紫薯甘栗卷$68、紫薯甘栗千層塔$20、紫薯甘栗杯$18，有興趣都不妨買個試試。

下次我哋美孚坊街飯聚，又要隔多幾個月先一聚，因為，下個朋友嘅生日未有耐嘛！

個人評分
味道：7/10
環境：6/10
服務：7/10
抵食：7/10
平均每人消費：HK$22

餐廳資料：
聖安娜餅屋 Saint Honore Cake Shop
美孚美孚新村吉利徑5C1號地下37號舖
2746 0251