古法烘焙 Gu Fah Bakery：古法有禮

自從知道古法烘焙荃灣店無再賣雞蛋仔，都少咗過嚟，不過，荃灣都喺常到嘅地方，所以，趁今日偶爾行過，就支持一下小店，買兩盒餅拎番公司請同事當下午茶。

一櫃有好多唔同款式嘅特色餅食，因為之前都試過佢好多款產品，所以，揀啲未試過嘅，結果就買咗豆沙老婆餅同黑白芝麻酥兩款。其實，都仲想試番牛油楓葉批，記得好香好鬆脆，不過，原來已經無再做。

豆沙老婆餅 $64

1盒10個獨立包裝（10 x 30g），乾淨衛生，翻轉盒盒底成份，主要喺以冬瓜蓉、紅豆、椰蓉嚟做，外皮都算鬆化，但未夠香，可能健康關係，落油都相對少；而豆沙餡佔成件餅大部份位置，無欺場，入口帶有幾濃郁嘅紅豆味，清香少甜，不過，質感上未夠軟綿，反而仲有少少乾身。

黑白芝麻酥 $52

同樣1盒10個獨立包裝（10 x 15g），不過，因為芝麻酥本身無餡料，所以輕身好多。襯番個名，個包裝盒以黑白炭紋襯托，寧捨型格。芝麻酥咬落非常鬆脆，亦喺少甜之作，雖然食到有芝麻香，如果再重手啲就更理想。

今次再幫襯發覺又貴咗，物價真喺只有漲，間唔時一次買嚟請同事試吓，都OK啦！

個人評分
味道：6/10
環境：7/10
服務：8/10
抵食：6/10
平均每人消費：HK$15

餐廳資料：
古法烘焙 Gu Fah Bakery
荃灣楊屋道1號荃新天地G31號舖
2941 0131