雖然酒家位處尖沙咀區，又喺isquare高層，裝修有氣派，但出奇哋收費唔高，菜式定價非常合理，仲要惠顧有贈送，連埋茗茶$12位，酸菜$10碟（6個人擺低咗兩碟），加一，再者，同枱老友唔大食，食咗七百蚊都未到，每人都只喺$115，實在好划算。
金盞明蝦球（免費）
晚飯大放「送」，期期不同，每星期都會轉款，每枱限選一款，我哋就要咗依個金盞明蝦球。酒家又幾好喎，我哋6個人，就跟人頭俾番6個明蝦球。所謂「金盞」，就喺炸蝦片，然後兜住個脆炸蝦球，外層粉漿炸得幾酥脆，但少少油膩，而蝦球幾爽彈，不過，面面真喺唔使唧咁多沙律醬，況且，又唔喺唧得好睇。
除咗散點，有個「當日孖寶」，賣$188，有份斑頭腩及一份浸白菜，又即管試試如何。
砂窩野菌干煸斑頭腩（例）
斑頭腩蘸粉漿酥炸再干煸，食落比較少油少汁，感覺乾身一啲，加入秀珍菇、蔥度，令整道菜香氣四溢。此外，斑頭腩裁得大件，夠肉地，又勝在嫩滑，如粉漿再薄啲就更正嘞！
米水杞子浸白菜（例）
「米水」浸白菜真喺第一次見識，以往多數都喺魚湯，雖喺唔知佢啲「米水」點整，感覺寧舍有米香，好清淡，除白菜，仲有啲草落，清清淡淡嘅一道素菜。
砂窩芹香麵醬雞 $108
另一道砂窩菜式，睇個名及菜式賣相，應以麵豉醬爆香啲雞球之後，再以乾蔥、芹菜兜炒逼香。雞球斬得大大舊，好有麵豉香，不過唔算好嫩滑；砂窩保持熱力持久少少，令芹菜香氣十足。
珍菌六味齋煲 $98
今晚點得特別多砂窩，依個齋煲又喺砂窩菜式，不過，賣相就肯定唔及餐牌張相嘞，因為餐牌相細緻地執過嚟，賣相特別精巧。一堆蔬菜材料，蜜糖豆、芋頭、冬菇、甘筍、白果、秀珍菇……等等炒埋一煲，味道其次，少油少鹽，實屬健康之選。
飄香荷葉飯 $128
荷葉飯個人標準好簡單，飯粒食起嚟清爽分明，帶有荷葉香，咁就已經OK，內裡加入咩料都只喺基礎以上嘅添加物。眼前嘅荷葉飯就未達個人要求啫，飯粒睇落好似幾分明，不過，一入口有點腍，未至於爛，但唔爽身，口感麻麻；另外，荷葉味好一般，只可以講，飯內料多，蝦仁、臘腸、雞肉……。
由於我哋無乜點貴嘢，都喺食吓小炒咁，所以，如果對菜式唔太要求，又想坐得舒服輕鬆，唔使等位，又唔使限時交枱，金殿海景都算喺一個唔錯選擇，至少，晌isquare之上，交通便利。
個人評分
味道：7/10
環境：8/10
服務：8/10
抵食：9/10
平均每人消費：HK$115
味道：7/10
環境：8/10
服務：8/10
抵食：9/10
平均每人消費：HK$115
餐廳資料：
金殿海景宴會廳 Golden Palace Seaview Banquet Hall
尖沙咀彌敦道63號iSQUARE 國際廣場26樓全層
2368 3898
金殿海景宴會廳 Golden Palace Seaview Banquet Hall
尖沙咀彌敦道63號iSQUARE 國際廣場26樓全層
2368 3898
沒有留言:
發佈留言