喵喵鍋 Nyan Nyan Shabu Shabu：「鍋」心之選

上個星期先同老死嚟到荃新天地2期地下一門町市場食飯，估唔到今周又嚟到呢度搵食，事緣朋友見到有家新開嘅日式涮涮鍋小店「喵喵鍋」，主打一人一鍋，啲套餐定價相宜，所以，一齊走過嚟探探店，晌近日仲喺寒寒哋嘅日子，食個暖心窩嘅涮涮鍋。

餐廳以鮮橙色為主調，望上去令人好醒神，而且，枱櫈排得唔算逼，啲枱又夠大張，放滿嘢都唔覺逼，加上環境夠光猛，整體嘅感覺真唔錯。

上文都講明一人一鍋，但唔覺枱面有爐頭，而侍應亦只送來個「鍋」而無「爐」，原來枱上嘅圓圈之下就藏咗個電磁爐，而控制板就設晌枱邊，操控簡易。

此外，枱底下小櫃桶就放有筷子、匙羹同紙巾，至於枱面就備有柚子醋、芝麻醬及日本辣椒油，自由取用。

套餐款式非常之多，除個別套餐有指定湯底之外，總共有6款湯底供選擇，此外，更有不少追加項目，而且，每款套餐已包野菜及白飯，所以，都應該好夠食。另外，主餐牌後頁就喺各種飲品，有酒精及非酒精嘅。

炎之蜆湯套餐 $148

呢一款喺火熱推介嚟，除包咗12隻大蜆，仲可以揀配無骨脆肉鯇柳片、草飼牛胸肉或美國雪花豚梅肉，既然喺大蜆，就揀配脆肉鯇啦，全海鮮嘛！呢個炎之蜆湯頗有睇頭，滾起之後，侍應會加入清酒再點起火成藍藍火炎，加上煮完啲蜆同灼過鯇魚片，最後啖湯非常之正，千祈唔好錯過。而且，每粒蜆脹卜卜，厚肉又鮮甜，脆肉鯇則口感爽爽脆脆，沾少少柚子醋令魚鮮味更突出。最後一鍋過烚晒成份野菜，配埋黏糯嘅白飯，真喺飽晒。

壽喜燒套餐 $156

呢個套餐就指定只配宮崎牛肩胛板腱，並標明有200g，都幾夠份量，而且，啲牛肩胛板腱色澤鮮潤，層層雪花，確喺幾吸引，輕輕灼10秒左右已足夠，肉質嫩滑又有肉香，並帶點油脂香，確實很不錯，另外配上一隻日本蛋，將牛肉沾滿蛋漿，口感更是鮮滑；此外，因為湯底喺壽喜燒，味道會帶甜，配牛肉很搭配。順帶一提，野菜除份量足，亦多元化，包括蓮藕、南瓜、蘿蔔、油豆腐、鮑魚菇、紹菜。

整晚侍應都會不時主動加湯，服務貼心，環境又舒服，用餐的感覺很稱心。

個人評分
味道：9/10
環境：8/10
服務：9/10
抵食：9/10
平均每人消費：HK$167

餐廳資料：
喵喵鍋 Nyan Nyan Shabu Shabu
地址：荃灣楊屋道18號荃新天地2地下一門町市場J41-42號舖
電話：Nil