尚萃軒 One Duck Lane：「Duck」天獨厚

依家去食一餐飯，唔單止喺講好食唔好食，仲要講整體體驗，同老死洪哥今晚嚟到「維港凱悅尚萃酒店」內嘅「尚萃軒」，絕對喺一次上佳嘅體驗，當然作為酒店嘅主要中菜廳，自然有其賣點。

入到裏面大廳，裝修非常之古典優雅，加上燈效，感覺蠻有氣氛，再者，對外一排落地玻璃窗，有180度嘅維港景觀。並且睇到對出嘅東海岸海濱公園，撞啱仲有無人機表演添！

貴為酒店裏面嘅中餐廳，唔單止裝修靚，枱上嘅餐具亦都好雅緻。此外，招呼亦真喺一流，由於我哋所食嘅套餐，每道菜都喺位上，所以，更感受到嗰份熨貼。

講開服務，平時上酒家，多數都喺俾碟辣椒醬，但晌呢度，先有辣椒油、豆瓣醬同自家製XO醬，而且，餐前小食更唔喺普通嘢，包括有油炸白飯魚仔、琥珀合桃及黑椒腰果，做得極之好食，香脆可口，真喺一粒接一粒食唔停。

飲品嘅供應又真喺估唔到咁多，有一系列獨特嘅中式茗茶，更唔喺普普通通嘅普洱、香片，如桂花人參烏龍茶、武夷肉桂茶……等等，此外，更提供啤酒、雞尾酒、紅白餐酒、烈酒……等等，而非酒類亦選擇不少，好似咖茶、特製梳打、沙冰、汽泡茶……等等。順便都介紹一吓我哋食嘅套餐「京式明爐烤鴨套餐」，一共7道菜，兩人享用，定價$1,488，除咗有店家嘅招牌京式明爐烤鴨之外，更有唔少高質素嘅中菜。

玫瑰荔枝紅茶 $30

所有茶品都是以小玻璃壺上，更以小蠟燭熱住，呢啲咪服務囉。講番轉頭，個玫瑰荔枝紅茶確喺幾好飲，堅有陣陣荔枝香味。

北海道十勝紅豆冰 $65

北海道十勝紅豆向來都有啲名氣，而十勝紅豆果然名不虛傳，粒粒又大又飽滿，煮得夠腍，入口清甜到得不得了。唔知喺唔喺用上北海道牛乳，但入口牛乳味又濃又香，口感絲滑。

花膠帶子酸辣羹
以酸辣湯為基調，再加入大量爽口木耳絲，而花膠同帶子都拆細咗，口感嫩滑，令到每一啖嘅口感 既豐富，又鮮味；湯羹嘅味道酸香帶微辣，好醒胃，再者，其稀傑度啱啱好。整體嚟講，用料十足， 製作有誠意，為今餐 個好開始。

京式明爐烤鴨

正所謂工欲善其事，必先利其器，食烤鴨當然配料都好重要，侍應會先奉上甜麵醬、蒜頭、白砂糖，以及青瓜條、京蔥絲，更可以加配甚具特色嘅黑松露鴨肝醬。

而師傅會即席將烤鴨拆解，雖然套餐只寫明京式明爐烤鴨為一道菜，其實，喺有兩食，一食喺鴨胸皮，二食喺鴨肉，睇見師傅手勢純熟，一陣就切好晒。

侍應建議烤鴨胸皮就咁沾少少白沙糖食就最好，鴨胸皮咬落非常焦脆，富油脂，但沾上白沙糖之後，產生咗一份化學反應，油脂晌甜味襯托下，反而會變得無咁膩。

再嚟喺鴨肉，帶少少皮，切得厚薄均一，入口皮脆肉嫩，油香豐腴，淨食就沾上黑松露鴨肝醬，真喺超正，而加埋所有配料，塗上甜麵醬以餅皮捲起嚟食，口感豐富，一樣好味。

羅勒金蒜炒蝦球

睇落好似好簡單，但實在深藏不露，蝦球又大又爽，口感極之彈牙，仲滿滿蝦鮮味，又有陣陣蒜香，底下墊有唔少粉絲，嗦滿汁，唔好錯過。

醬爆銀鱈魚

銀鱈魚外層好香脆，裡面肉質非常滑溜，魚味十足，而銀鱈魚本身油份重，但勾咗薄薄一層酸酸辣辣嘅芡汁，令油脂得以平衡，食起嚟更完全無油膩感。

京蔥炒蒙古羊仔柳
比起牛肉、豬肉，小弟就更加鍾意食羊肉，呢一道羊仔柳炒得十分香口，充滿蔥香，又好夠鑊氣，最正喺啲羊仔柳好嫩滑，羶味唔太重，相信大部人都接受到。

濃湯竹笙大根萵筍

唔喺普嘅嘅濃湯浸時蔬，單喺賣相已好別緻，小呷一口奶白嘅濃湯，果然濃郁鮮甜，啖啖精華，加埋爽口嘅竹笙，同埋大根絲（即喺蘿蔔）、萵筍絲，成為一道清新嘅時蔬菜式。

甜品薈萃

最後，完滿嘅一餐定要有美味嘅甜點，一登場就喺３款甜點：香芒楊枝甘露、酥皮鴨蛋撻、手工芝麻卷。楊枝甘露用料十足，汁底香滑，果肉鮮甜；鴨蛋撻撻殼酥脆，層次分明，雞味濃郁；芝麻卷用上黑灰兩隻色皮，捲出螺旋紋，自然更好睇，而口感軟熟，芝麻味突出，真好食。

整體嚟講，今餐真喺無咩挑剔位，無論環境、服務、菜式，都喺一次非常好嘅體驗，當然，好嘅享受喺要付出多少少，不過，也是物有所值，除咗同朋友嚟嘆吓，同屋企人嚟歡聚亦喺個十分之好嘅選擇。

個人評分
味道：10/10
環境：10/10
服務：10/10
抵食：9/10
平均每人消費：HK$900

餐廳資料：
尚萃軒 One Duck Lane
地址：北角北角邨里1號香港維港凱悅尚萃酒店西座2樓
電話：3896 9896