Marouf Coffee：閒情細味高質早餐

呢個週日大清早要出嚟尖沙咀有集合聚會，所以，晌聚會前專登約過好弟兄出嚟食過高質早餐， 所選嘅地點就喺聚會點對面嘅「Marouf Coffee」，純粹貪其夠晒就腳。

餐廳以黑色為主調，襯以金色裝置，所以，顯得摩登、型格，而且，室內嘅空間都幾大，樓底又比較高，向街嘅一邊更喺全片落地大玻璃，所以，空間感十足，感覺開揚。

餐廳如大多數咖啡店採自助模式，所以，除收銀處，另一邊角落擺放咗環保餐具、餐紙、糖包……等等，自由取用。

飲品嘅選項，包括經典濃縮咖啡、特色咖啡、茶品、新鮮果汁、沙冰……等等。

此外，亦有零售自家品牌嘅咖啡豆及膠囊咖啡！

食物方面，就擺晒晌收銀旁嘅玻璃櫃之內，包括多款三文治、沙律、烘焙、乳酪、甜點……等等，賣相都幾吸引。

我哋就揀返自己嘅心水三文治，而小弟就襯杯咖啡，老友就喜歡嘆杯舒心嘅熱茶。

伯爵茶 $32

出面好多咖啡店，如果飲熱茶嘅話都只喺一個茶包沖泡嘅一杯熱茶，但呢度就成壺上，一來變相份量多啲，二來保溫力又持久啲。老友就話個伯爵茶好芳香，朝早飲感覺特別清爽舒暢，亦好襯個濃味嘅三文治。

鮮奶咖啡 $41

嚟到咖啡店，自然喺揀小弟最喜愛嘅鮮奶咖啡啦。雖然拉花就未喺好細緻，不過，沖泡嘅手勢都算唔錯，晌無攪過嘅情況下，飲落去每一口口感及味道都好均勻，再者，咖啡味比較沉實醇和，又有果仁香氣。

烤牛肉三文治 $68
老友就比較喜歡食肉，所以，揀呢一款烤牛肉潛水艇三文治，睇外形就知份量十足，由於三文治 都會烘番熱，故此，麵包入口軟熟又暖笠笠，而且，餡料十足，烤牛肉有肉香，加埋溶透嘅車打芝士、生菜、烤過嘅甜紅椒，無論味道，還是口感，都極之豐富，作為早餐，十分之飽肚。

煙三文魚忌廉芝士貝果 $68

小弟就相中呢一款貝果包，對比起上面嘅潛水艇三文治，貝果包嘅質感煙韌啲，有咬口，裡面除咗鋪上唔少煙三文魚之外，更加入好多忌廉芝士，煙三文魚油潤有煙燻香，而忌廉芝士柔滑香濃，跟煙三文魚非常搭配，襯埋杯醇厚嘅咖啡更喺一流享受。

平常大多數都喺晌屋企食早餐，偶爾同老友出去嘆吓咖啡，食份高質嘅三文治，唔止喺一種享受，更喺一種生活態度，細味人生。

個人評分
味道：8/10
環境：9/10
服務：8/10
抵食：8/10
平均每人消費：HK$105

餐廳資料：
Marouf Coffee
地址：尖沙咀天文臺道8號地下3號舖
電話：Nil