MU Club：星「Club」美食

正所謂在家靠父母，出外靠朋友，今晚同朋友嚟到「香港都會大學」內新開無耐嘅中餐廳「MU Club」，真喺仗着朋友喺呢度嘅教職員咋，因為「MU CLub」暫時未有對外全面開放，只限教職員專用，亦可以帶其家人或朋友可以嚟用膳。

餐廳裝修摩登，以淺灰色為主調，枱與枱之間亦排得比一般酒家闊落，加上嚟嘅人都有所限制，所以，客人會無咁雜，相對質素較高，整體感覺清幽，好啱同朋友或家人聚餐。

枱上嘅餐具好精緻，用番「都大」嘅主色「藍」同「綠」，仲擺上小小裝飾做點綴；沖咗壺菊花，清熱明目，非常芳香，而服務方面好好，侍應唔單止不時為我哋添水，更主動斟埋茶，加上好有禮貌，令到成晚嘅用餐體驗都好舒服。

翻一翻主餐牌，選擇都非常之多，如果得兩個人又唔想諗，最好就喺「二人晚市套餐」。茗茶收$10位，但選擇多，此外，亦有自家製花草茶飲、咖啡、汽水、果汁……等等供應，比一般酒家多。

菜式方面，有一系列推薦菜式，亦喺我哋重點相中之列，仲有前菜、湯品、肉類、家禽、海鮮、炒粉麵飯、蔬菜、甜品……等等，一應俱全。睇起嚟唔少菜式都好特別，有傳統嘅手工菜，亦有啲新派啲嘅摩登中菜。聽朋友講，午市仲會有點心及午市套餐供應，非常實惠。

撞啱近期做緊消費獎賞禮遇，憑之前嘅收據於發單日起計14是內，惠顧晚市有有85折，老友身為教職員，經常會嚟食晏，自不然益到我哋今晚享用到個優惠啦！

無花果海底椰燉雞湯 $42

朋友話佢哋呢度啲湯品好出色，叫我哋唔好錯過，所以，嗌咗其中兩款一齊試下。講到清潤，呢一道燉雞湯飲落真喺非常之清潤，撈一撈就見到用料十足，而且，味道實在鮮甜、清潤，果然無欺場。

黃扒魚肚金湯 $68

朋友話除咗上述個燉湯出色之外，呢一款魚肚金湯亦可以講喺招牌之一，一身金黃嘅湯色，原來喺用雞湯加上南瓜造成，入口非常之綿密、鮮甜，而且，南瓜未突出，非常好飲；加上裏面有大大件魚肚，爽口彈牙，怪不得稱得上招牌。

茶煙燻豉油雞 $168（半隻）

豉油雞當然食過唔少，但喺加上茶燻效果，感覺真喺截然不同，一揭開蓋時煙燻氣一拼湧出，已經聞到陣陣煙燻香，而啲雞嘅外皮有閃亮感，食落即有陣陣煙燻香味，但又食到豉油嘅豆香；再者，啲雞肉真喺超嫩滑，師傅嘅手工非常紮實，喺一度出色嘅手工菜。

法式芥末蝦球 $148

雖然呢個芥末蝦球只喺一客6件，但每件蝦球都用上超大隻虎蝦，有成半個拳頭咁大，披上一身 金衣，非常之有睇頭，而下面墊有脆卜卜米通，喺非常之有心思嘅做法。講返件蝦球，彈牙就唔再講，有濃郁嘅蝦鮮味，芥末醬又調得啱啱好，有芥末嘅香，帶微微辣，卻唔嗆喉，超好食。

秘製慢煮牛肋骨黑叉燒 $298

作為香港人，叉燒就梗喺經常食啦，不過，一般都喺搵梅頭整（豬肉），但今次呢個叉燒就好特別喇，一來用上慢煮手法，二來以牛肋骨肉嚟整，真喺既有賣點，又有誠意，而且，原條牛肋「骨」伴碟，令賣相添多分震撼感。估唔到比預期好食，邊位有焦脆感，肉質軟腍，既有脂香，又富肉汁，而伴碟嘅金菇沾上肉汁，亦都寧舍好食。

錦繡鯉魚炒飯 $148

另外，都點個飯墊墊肚，咁多款炒粉麵就以呢道炒飯最鬼馬，加上大量蟹籽，裝飾到成條錦鯉咁，打卡一流。最正喺佢唔喺得個樣嘛，飯粒炒飯得夠乾身，裡面仲有好多料，加上蟹籽，食味豐富，口感亦都好好，食得出製作花過心思。

炸彩虹湯圓配薑汁湯圓 $42

最後去到甜品一環，一樣喺處處驚喜，湯圓大大粒，外皮軟糯，芝麻餡軟滑且極具芝麻香，個湯就夠晒薑。而炸彩虹湯圓就外皮沾滿色彩繽紛嘅脆米，令到口感多一層脆卜卜感，幾過癮。

牛油果甘露 $45

楊枝甘露就食得多，牛油果甘露就肯定未試過，真喺要試試先。以厚身玻璃碗奉上，顯得高檔，而淡綠嘅牛油果露，口感順滑，冰涼爽快，帶淡雅嘅牛油果味，啲柚肉又夠清甜，真心唔錯。

總結，唔止環境清幽，服務熨貼，更緊要都喺菜式做得有水準，又有賣點，夠特色，真希望將來會開放埋俾街外客啦！

個人評分
味道：10/10
環境：9/10
服務：10/10
抵食：9/10
平均每人消費：HK$315

餐廳資料：
MU CLub
地址：何文田牧愛街30號香港都會大學正校園A座12樓泰寧軒
電話：3613 0124