山區裡的走走趯趯: 山海經小酒館 Shan Hai Ching Bistro：二人套餐有「經」喜

2026年2月25日星期三

山海經小酒館 Shan Hai Ching Bistro：二人套餐有「經」喜

晌香港，日本菜向來好有市場，而晌小弟嘅飲食足跡，日本菜亦佔一定份量，其實，小弟對日本菜並無特別偏好，只喺身邊較多朋友都喺日本菜支持者，不過，好奇怪，佢哋又唔喺成日去日本喎。今晚，就同個老死嚟到荃新天地2期地下一門町市場搵食，佢話呢度有好多日本餐廳供選擇，最後，揀咗「山海經小酒館」，一來晌門口已睇到裡面好有居酒屋氣氛，二來晌門口棟咗個二人套餐，度過絕對非常抵食。

踏入餐廳，淺木色系嘅設計，除咗一派好和風嘅居酒屋格局之外，就睇到晌裝修上花咗唔少心思，掛晌天花嘅布幕、吊燈，一啲小裝飾，都顯得更加別緻。再配合埋柔和嘅燈光，極具居酒屋氛圍。我哋被安排坐晌入門口左邊嘅卡位，寧舍闊落，而右邊仲有個廂房，可惜有客，未有機會睇到內櫳喺點。嚟到時間早，越夜越多客人。

而枱上已放國筷子、紙巾、醬油碟及簡單調味料，最特別更布一支昆布豉油，非常有誠意。題外話，招呼非常之好，唔單侍應好有禮貌，仲好有心講解一下菜式要點。

先貼出散點餐牌俾大家參考，分類計有沙律、酒希小食、刺身、燒物、串燒、天婦羅、鍋物及食事，可以講晌居酒屋嘅基本類別都有。

既然喺居酒屋，自然唔少得各式酒品，尤其清酒，此外，亦有多款非酒精飲品提供。反而，睇勻都好似唔見有甜品。

最後，介紹埋啲套餐，分別有晚市套餐、2人套餐、4人套餐，有平有貴，豐儉由人，而當中嘅2人套餐比散點肯定抵好多，個餐包咗開胃菜、串燒、小食、主食、鍋物、白飯或手打烏冬，以及2罐汽水，亦可以加錢轉非酒精飲品，選擇甚具彈性。

溫泉蛋沙律
老死話想食得多樣化啲，所以，揀沙律，得確唔單喺一般沙律菜、車厘茄，仲有啲羽衣甘藍，入口非常新鮮爽脆，由於加咗柚子醋，酸酸香香好醒胃，而且，隻溫泉蛋做得啱啱好，蛋黃綿綿，令食味更有層次。

是日精選串燒4款

精選串燒喺雞尾肉、大蝦、豚肉串及紫酥雞肉，如果散點，呢份串燒已經要$106啦，所以話個餐喺抵食嘅。一送上枱香氣撲鼻，趁熱食特別滋味，除咗燒得靚仔之外，仲喺用料不賴，夠香口，又唔會燒到乾晒水，甚富肉汁，紫酥雞肉口感嫩滑又滲出紫酥香，甚有驚喜。

京蔥蒜片炒牛舌粒

原本餐牌可揀嘅喺蒜片炒腎片，但侍應話改咗炒牛舌粒，牛舌就仲啱我啦。以為會細細碟，原來都幾夠份量，牛舌厚切但咬落柔韌彈牙，以京蔥同蒜片炒過，連帶牛舌本身獨特嘅香味，味道更具層次。

鹽燒時令魚

呢晚嘅時令魚喺笛鯛，喺一款小弟都極之少接觸嘅魚鮮，不得不讚師傅手勢，睇都睇得到燒得非常靚仔，最窩心喺一邊已順手揭起外皮，睇到整排魚肉，先喺淨食，肉質嫩滑，富魚鮮味，鹽燒令味道添上幾分鹹香味，再試試沾上自家製嘅泰式酸辣醬，都幾有辣勁，包醒神。

牛肉酸菜鍋配手打烏冬
雖然日本菜有唔少潰物，但我估應該無酸菜呢樣嘢，咁特別嘅配搭真喺要試一試先。未講啲酸菜、牛肉，先要講個「鍋」，外觀精美到不得了，仿如一件藝術品。打個蓋打張卡先，見到一片又一片嫩紅色嘅肥牛，已有種先聲奪人嘅感覺，一滾起就收火，煮得啱啱好，牛肉肉質柔嫩，有肉香，又有脂香，內裡有唔少蔬菜、酸菜，湯底帶微酸，卻有中等辣度，食起嚟有份開胃感。而手打烏冬亦都不賴，烏冬滑溜溜，咬落煙煙韌韌，食罷更是令人暖笠笠。