Lizto：小清新之夜

荃灣西站附近一帶嘅商場算喺小弟經常嚟嘅地方，一來有時過嚟英皇睇戲，二來晌度一個站就返到美孚，交通勁方便。今晚嚟到「荃新天地」嘅「Lizto」，都喺老友嘅推介，話啲食物質素高，環境舒服。

的確，成間店都喺落地玻璃，晌門口已經好通透見到成間鋪喺點，一室木系，裝修簡約，好有小清新嘅感覺，又有種文表風，感覺悠閒舒適。

最有心喺門口旁設置咗幾張木枱，明顯喺寵物友善專用區啦，哈哈！

晚市時段提供晚餐，餐湯連主菜，定價$118-$248，豐儉由人，仲可以加錢升級意式雜菜湯，而飲品及甜品亦有加配優惠，選擇有彈性。好幾款主菜都想試，最後，就揀啲「戴帽」嘅廚師推介款式，另外，其中一客餐湯選擇升級，試試唔同嘅餐湯。

蕃茄忌廉湯

外觀平滑，色澤鮮橙，望落去感覺幾對辦，細嚐一口，先喺質感非常之滑溜，口感細緻，而且，蕃茄味突出，酸甜度啱啱好。

意式雜菜湯 +$18
呢款湯算得上意式湯中嘅經典，撈一羹就知好足料，喺一道營養豐富嘅菜湯，味道酸香鮮活，並伴有兩片烘得香脆，卻口感軟熟嘅麵包，挑剔位就喺嚟到時個湯唔夠熱啫。

蒜香鳀魚蜆肉意粉 $148

店家有提供手工意大利麵，只喺加$10就當然要試真啲啦，所以，改為手工寬條麵+$10。鯷魚功效有啲似我哋嘅蝦醬，所以，加埋啲蒜片，個寬條麵食落就已經有陣陣鹹香味，而麵條咬落又煙韌又咬口，又有蛋味，更非常掛汁，蜆肉份量唔少，夠肥美，亦有海水嘅鹹鮮味。

西京燒西班牙黑毛豬 $188

西班牙黑毛豬向來就喺高質素嘅代名詞，以日式西京燒嚟做，真喺幾有心思，而黑毛豬真喺燒得好靚，整體賣相誘人。外層焦香，裡面仲帶點粉嫩，咬落柔軟富肉汁，質感非常腍滑，味道有陣陣麵豉香味，沾上自家製蘋果醬汁，真喺美妙嘅配搭；還伴有白蘿蔔同椰菜，前者嫩滑無渣，味道清甜。

開心果巴斯克蛋糕 +$48
加配甜品有減$20嘅優惠，所以，揀咗呢款巴斯克蛋糕，睇得到成件都喺青綠色，所以，入口開心果味真喺好突出卻不失芝士香，而面頭烤到焦燶，喺巴斯克芝士蛋糕嘅特色，糕身質感幼滑，做得好出色，值得推介！

玫瑰鮮奶咖啡 +$33

點咗甜點，點都要嗌杯鮮奶咖啡嚟襯吓，店家有多款唔同口味嘅鮮奶咖啡，選了玫瑰口味，唔單止心形拉花拉得線紋細緻工整，加咗幾片玫瑰花瓣更喺有畫龍點睛之效；而咖啡嘅口感順滑，咖啡味醇香，奶泡撞入咖啡度又均勻，真喺要讚一讚師傅沖泡嘅手勢。

唔怪之得老友咁推介，所有菜式確喺做得好出色，而且，環境舒適，服務又好，侍應有禮，值得回頭再幫襯嘅餐廳。

個人評分
味道：9/10
環境：9/10
服務：9/10
抵食：9/10
平均每人消費：HK$245

餐廳資料：
Lizto
地址：荃灣楊屋道1號荃新天地地下G75A, G76C & G76D號舖
電話：2886 0603