Ha Noi越南菜：賞心「越」目

又嚟到星期五晚無飯夫婦日，兩公婆懶煮出街食，諗一諗好似好耐無食越南嘢，加上呢幾日天氣又凍返，食吓越南湯河暖暖身喺幾唔錯嘅選擇。老婆喺尖沙咀返工，就想起喺「慶坊」嘅「Ha Noi 越南菜」，因為兩年前嚟過幫襯，嘢食質素唔錯，加埋價位相宜，值得翻兜！

環境無點變，就容許小弟抄番上次食評對餐廳環境嘅描述：餐廳門面嘅裝修顯得幾骨子，入到裡邊，地方都幾大，好闊落吓，一室光猛整潔，牆上、柱位有少少越南相關嘅裝飾物作點綴，感覺幾唔錯。

翻一翻餐牌，睇落亦好似無變，選擇依然咁多元化，由越式湯粉、撈檬、飯類、越式法包、米紙卷、沙律、濱海、小食，以及廚師推介嘅精選菜式，仲有啲非常抵食嘅2、4人套餐，轉特飲都唔使加錢，正呀！總之選擇非常之多，同上次一樣，揀咗個平平哋只賣$198嘅二人套餐。

飲品方面，亦有好多嘢揀，越式特飲啦，沙冰啦，暖意風情熱飲啦，顧及大眾需要，都有啲基本嘅港式飲品。而點咗主食，都可以以優惠價加配飲品。

枱面就放咗一啲特色嘅調味醬料，而餐具、餐紙、牙簽等就放晌枱側拉櫃中，排列整齊，自由取用。

越式香茅雞翼
小食2揀1，因為老婆對紙米卷麻麻，所以，就只剩雞翼可揀。炸得甘香，入口夠熱焫，最正喺皮脆肉香，醃得啱啱好，有陣陣香茅味，而且，又唔算油，好食。

田園灼時蔬

老婆就鍾意食多啲菜，所以，個餐包一碟灼時蔬就好合佢心意。簡簡單單生菜以上湯灼，我估就正正喺淥河粉啲牛骨湯，又灑咗啲金蒜，所以，特別有陣陣香味。

香茅豬扒湯檬

雖然唔喺第一次嚟，但見到咁大碗湯檬都仲喺被佢嘅份量嚇一嚇，檬粉好爽身，份量多到好似食極都有咁，本身個湯底都好唔錯，再唧少少青檸汁落去，令個湯頭變得更清爽；至於啲豬扒另碟上，咁就唔會浸腍，咬落好香口，亦唔油膩，倒喺肉質鬆化，滲出香茅香味。

生牛肉湯河

講到越南生牛肉湯河，就喺既經典、又傳統嘅湯粉之一。個牛骨湯味道濃郁，且香而不濁，而河粉份量同樣勁多，口感夠晒滑溜；生牛肉啱啱好浸熟，所以，入口口感嫩滑到不得了，卻不失肉香，成碗湯河都做得好有水準。

椰汁紅豆冰

老婆就特別鍾意紅豆冰，加上個套餐點紅豆冰唔使額外加錢。平常茶記嘅紅豆冰就加奶水，呢杯就加椰汁，自然更有越式風味，飲落更加清甜，而紅豆亦煮得夠腍，佢話如果俾多啲就更好，食咗幾啖無晒，有啲唔夠喉啫。

鮮芒果沙冰 $38

小弟幾鍾情芒果系飲品，加上店家標明喺鮮芒果做，自然喺一大亮點，所以，揀杯芒果沙冰。沙冰嘅份量非常之足，夠晒大杯，滿到瀉咁滯，好有睇頭，仲加咗少少芒果粒作點綴，芒果味確喺清甜濃郁，此外，質感打得好幼細，完全唔會有嗰種冰粒感，飲得出真材實料，更加喺襯晒熱焫焫嘅湯河！

紫糯米芒果乳酪 $38

紫糯米配芒果通常喺食泰國菜時嘅甜品組合，配上乳酪反而喺第一次試，感覺又幾新奇。乳酪本身就少少鹹鹹哋，加埋啲甜甜哋嘅紫糯米、芒果，感覺又真喺幾得意。

整體嚟講，食物絕對保持水準，而且環境幾好坐，啲侍應招呼週到又有禮貌，以尖沙咀區而言，價錢相當實惠，食咁多嘢人均都喺百鬆啲，若非杯沙冰唔計入餐飲，要另外加配，食得會更平！

個人評分
味道：9/10
環境：8/10
服務：8/10
抵食：10/10
平均每人消費：HK$137

餐廳資料：
Ha Noi越南菜
地址：尖沙咀彌敦道36-44號重慶大廈heath慶方地庫S21號舖
電話：2219 9468