山區裡的走走趯趯: Shahrazad Lebanese Dining Lounge & Bar：中東菜初體驗

2026年2月3日星期二

Shahrazad Lebanese Dining Lounge & Bar：中東菜初體驗

中東，未踏足過嘅國度，既神秘但又唔算太過陌生嘅地方（因為網上都有好些資訊），但講到「黎巴嫩」呢個國家，就只知其名，其他嘢可以講一無所知。今日約咗舊同學食晏，就揀咗賣黎巴嫩菜嘅「Shahrazad Lebanese Dining Lounge & Bar」，探索吓這異國風情。

未入餐廳，單喺門口已經感覺到嗰份異國風情，踏進餐廳，裝修華麗又富特色，以藍色為主調，幽暗嘅燈光下，加上富中東色彩嘅窗花，話自己身處異地都有人信呀。

此外，仲有啲「露台位」，同樣裝修別緻，更自成一角，三五知己嚟飲吓嘢、傾吓偈都好。

初時以為呢類特色餐廳會消費高，但佢哋嘅午餐就非常相宜，有兩道前菜、主食（3揀1）、甜品，都只喺賣$98，難得喺有特色，平時真喺少會食到。

Assorted Mezze Platter

餐牌就有寫明呢道前菜有油浸釀小茄子、茄子蓉及紅椒核桃醬（左至右），再配上中東包，絕對富地道特色。小弟就無刻意問點食法，總之就自由發揮，個包喺中空，所以，就將啲紅椒核桃醬釀入包心，面頭再放上小茄子發及茄子蓉，味道紛陳又協調，更有份層次感，此外，個包烘得熱熱咁上枱，喺加分位嚟。

Fettat Hummus

另一道前菜亦好有特色，由鷹嘴豆、乳酪、脆皮塔餅及漆樹粉組合而成，屬冷盤，食落涼涼哋，味道酸酸甜甜，令人好開胃，而脆皮塔餅就有啲類似米通嘅脆餅，好脆口，沾滿乳酪格外好食，至於漆樹粉都喺第一次聽，上網搵搵先知喺中東常用香料，帶微酸，有啲似檸檬嘅香味。

Halat Khodar

雖然主菜3揀1，但好易決定到，因為舊同學唔食羊，所以就定下個時蔬塔吉鍋同烤雞小麥飯。個塔吉鍋睇上就似喺簡簡單單嘅雜菜鍋，有意大利黃青瓜、甘筍、薯仔同青豆，蕃茄汁底酸香鮮活，拌飯一流。最有趣喺配咗兜米粉飯，初頭睇英文都已好奇Vermicelli Rice喺咩嚟，原來喺啲幼長嘅印度米再混入一啲炒米粉，口感都幾特別。