Detour：慢活早餐

身邊好多朋友都話小弟識享受，其實，只喺隨遇而安、及時行樂而已，算唔上咩享受人生，趁健健康康，行得走得又食得，不時嘆吓好嘢，就好似今朝同老表嚟「Detour」食個高質素早餐、嘆杯意式咖啡。

「Detour」屬小型咖啡店，所以，地方唔大，一室木質枱櫈，喺排得有點密嘅，幸而樓底夠高，空間感都OK。而裝修簡潔，牆上掛咗啲富藝術感嘅畫作，客人又唔多，所以，感覺都舒服寫意。

一大張餐牌就羅列晒所有食品，包括各式咖啡、茶飲、梳打、果汁……等等，食方面就有多款自家製烘焙包點、乳酪、烤三明治、早午餐拼盤，單睇啲食材組合確喺幾吸引。

義式肉腸、莎樂美腸、帕馬火腿、雅枝竹、意式麵包 $75

小弟就選咗全份嘅烤三明治（可以揀半份），新鮮製作，送到上嚟熱焫焫，散出陣陣烘麵包香氣，拿上手非常墜手，打開個包睇睇，放咗非常多餡料，咬落麵包軟熟，味道豐富，口感多層次。

帕馬火腿拼盤配酸種麵包牛油 $130

呢份拼盤早餐亦好有睇頭，餐牌亦已寫明包括帕馬火腿、半熟雞蛋、帕爾馬干酪芝士、牛油果、黑蕃茄、菠菜配上新鮮酸種麵包及牛油，睇得出用料唔馬虎，好似啲火腿油潤鹹香，牛油果綿密腍滑。酸種麵包烘得脆脆，咬落有韌性，塗上牛油，無論配料配搭咩組合，效果都各有風味。

拿鐵 $40

講到意式咖啡，小弟都喺鍾情奶泡系，而拿鐵就最得我歡心。除咗表面非常之平滑之外，拉花亦幾唔錯。但重點都喺要好飲，的確沖泡得好唔錯，咖啡嘅香味醇厚芳香，入口口感綿密且頗均勻，完全唔使攪，每口都好一致，咖啡嘅香味亦夠醇和。

卡布奇諾 $40

老表同樣鍾意奶泡系嘅咖啡，而佢就揀奶泡更豐厚而輕盈嘅意大利泡沫咖啡，賣相都好靚仔，飲落佢就覺得好飲，咖啡味香醇，面層嘅奶泡好輕盈柔滑。

老實講，喺度食個早餐確喺唔平架，但舒適恬靜嘅環境，再加高質素嘅食材，悠然自得咁hea住坐，好有慢活嘅感覺。

個人評分
味道：9/10
環境：8/10
服務：9/10
抵食：8/10
平均每人消費：HK$140

餐廳資料：
Detour
地址：中環皇后大道中129號地舖
電話：Nil