大快活 Fairwood：我的星期六美孚早餐 ~ 刮目相看

好耐之前，我哋呢邊美孚區都有間「大快活」，但喺就開喺死場「盈暉薈」，非常方便我哋，但呢個場真喺人流稀少，所以，疫情期間都執埋。但最近就晌「曼克頓山」呢邊重出江湖，令到美孚區又再有齊3大連鎖快餐店。我哋都襯襯熱鬧專登行遠啲過嚟食個早餐，然後再行下山或者行行公園。

咪睇佢門口細細，其實，裡面環境都幾大，入門口左右兩邊都有用餐區，但喺右邊嘅就大好多，而且仲有落地大玻璃窗口位。我哋盡可能都會揀坐嗰邊，因為感覺光猛又開揚。此外，佢整體嘅設計幾醒目，就喺將收銀位、自助點餐機擺晒喺門口，啲人就喺商場通道排隊，唔會阻住餐廳裡面嘅用餐區。

大部分快餐店都會有個櫃枱放滿啲簡單調味料包 類，等大家自由取用，但晌呢度，走多步，有個糖包回收箱，亦見佢哋喺環保上做咗好多功夫，呢方面值得讚一讚。

如大部分快餐店，早餐嘅選擇非常之多，而且，有唔少特色嘢，跟「大家樂」、「美心MX」都好唔同，部分早餐嘅定價都好有驚喜，亦有唔少會員優惠，而且使用條件唔會話太多限制，比較用家友善，最緊要喺當中有好多款選擇都啱老婆口味。

L15. 雞胸柳扎肉湯米粉+熱咖啡 $29

呢個阿活爆底價湯米粉真喺非常抵食，除咗大大碗湯米粉之外，雞胸柳堅俾到兩大件，煎到微焦，咬落喺出奇咁嫩滑，老婆話好有驚喜，而扎肉亦唔喺平價貨，再者，米粉煮得啱啱好，無過腍，個湯有啲味，唔會咁寡 。

C27. 沙嗲牛肉米+脆香黃金雞扒+英式多士+熱奶茶 $36

呢一款每週驚喜真喺抵，原價標$40.5，依家$34就有香菇雞絲湯米粉+脆香黃金雞扒+英式多士跟熱飲，但小弟就+$2轉沙嗲牛米，喺撳自助機時偶然發現可以轉款。啲沙嗲牛足料又夠香質感腍滑，雞扒亦煎得香口好味，熱奶茶雖然未至於話好飲到飛起，但茶底絕不失禮。

事隔多年再次幫襯返「大快活」真喺比預期好好多，食物好咗，由收銀、出菜到收餐具，啲店員都好有禮，確喺有啲刮目相看嘅感覺，而且，可以講定價方面比另外兩間連鎖快餐店及附近茶幾都更有競爭力。

個人評分
味道：9/10
環境：8/10
服務：8/10
抵食：9/10
平均每人消費：HK$33

餐廳資料：
大快活 Fairwood
地址：美孚寶輪街1號曼克頓山商場(曼坊)1樓102-103及105A號舖
電話：2856 4052