來多碗車仔麵：一「麵」之緣

啱啱去完旅行返嚟，第二日就返工，啲行李都仲未執，所以，今晚收工後就出街食，費時嘥時間煮，食完早啲返去繼續執拾行李。是夜就嚟到「來多碗車仔麵」，簡簡單單食碗車仔麵。

店內裝修簡簡單單，而一入門口位就喺點嘢食嘅開放式廚房，客人喺直接晌度落嗌咩食：麵底、餸料，跟住，收銀枱阿姐就會直接計數，非常直接。

再望入去，右邊整幅牆都喺畫咗上海街舊街景，非常有趣。

餐牌就貼咗晌近門口廚房嘅玻璃之上，一眼睇晒，兩餸起跳，麵底少有哋有瀨粉，餸料分$10、$15兩個價，仲有啲特色少食，飲品跟餐又有優惠。

基本嘅調味料放晒晌枱上，但廚房前枱仲有有沙嗲醬、微辣、魔鬼醬辣，小弟就唔敢試喇，有興趣嘅朋友可以挑戰一下。

最後，我哋同樣點咗4餸麵，再加多一個蠔油生菜及豆漿。

豬皮、蘿蔔、冬菇、牛肚米粉 $58

睇番以前嘅食評，老婆嘅車仔餸又喺揀豬皮、蘿蔔、牛肚，再加冬菇，好傳統嘅組合。份量都好夠，豬皮好爽口，蘿蔔非常之清甜，冬菇夠厚伕，牛肚炆得好腍，而且非常入味，米粉爽滑及無話煮過籠，質量皆優。

豬腸、貢丸、牛筋、豆卜油麵 $58

我揀餸料就盡量唔撞老婆嗰啲，咁樣可交換嚟食。豬腸內仲有少少肥膏，但就無豬臊味；貢丸好爽口彈牙，牛筋亦都炆到極之軟腍，同埋好入味，至於豆卜唔油膩，都算有豆香，加埋心水嘅油麵，叫阿姐俾啲腩汁，寧舍好食。

蠔油生菜 +$13

食得平衡少少當然要多點個蔬菜啦，再者，老婆就鍾意食多啲菜，夠健康，就簡單點一份蠔油生菜，份量唔笠多，但啲生菜淥得仲保持一份爽脆口感。

豆漿 +$9

以優惠價加配，估唔到豆漿有咁大支，大唔大都唔緊要，最緊要夠豆味嘛，而且，唔太甜，好過飲汽水啦！

只喺嗌咗兩碗4餸麵，再加碟生菜，好夠飽。用餐期間，都見唔少人嗌外賣，亦有人要求加魔鬼醬辣，所以話，車仔麵喺唔少香港人嘅至愛平民美食。

個人評分
味道：8/10
環境：7/10
服務：7/10
抵食：8/10
平均每人消費：HK$69

餐廳資料：
來多碗車仔麵
地址：旺角上海街441號友榮大廈地舖
電話：9035 2465