貓抓烤肉 Meow BBQ：抓住烤肉的尾巴

最近從食友口中得知，晌旺角有家集韓式及日式嘅烤肉店「貓抓烤肉」，啲套餐非常抵食，而且，環境十分寬敞。剛巧早排小病，好番晒當然要食餐好嚟補數啦，所以，就拉咗老表一齊嚟嘆一嘆，又傾吓近況。

餐廳位處二樓，因為以貓為主題，一出電梯就睇見大大隻好似招財貓嘅貓公仔，十分搶眼。四周圍都有好多貓貓畫作或得意標語，雖然小弟唔喺貓控，但都覺得有趣。

講真，餐廳唔止地方大，而且，樓底夠高，啲卡座仲特別闊落，坐落好舒服。再者，講到服務，幾位侍應有禮之外，更不時主動幫手換爐紙。

枱上已放好餐具、燒烤工具、紙巾，仲有就喺幾款蘸料，包括：萬能乾料、清爽柚子汁、牛肉燒肉汁，各有不同特色，最貼心喺餐墊紙有埋圖文介紹幾款蘸料特性，仲加埋烤肉技巧添。此外，蘸料架中仲有一枝喺生油，烤蔬菜時用，令啲蔬菜無咁易燶。

餐廳無正式餐牌，掃二維碼落單，分門別類都好清楚。不過，店員就話最近嘅推廣就喺「貓抓好運厚切和牛貓罐頭」同「萌貓燒肉套餐」（分2人 / 4人份），性價比非常之高。而我哋揀嘅2人燒肉套餐（$348）喺M5和牛升級版，內容十分豐富，包括全明星拼盤、秘製西班牙豬五花、咔吧雞軟骨 / 照燒雞腿肉（2揀1）、新鮮小吊桶 / 海捕虎蝦（2揀1）、酸辣爽脆木耳拍青瓜、炸薯餅 / 重慶紅糖糍粑（2揀1）、貓草茶 / 貓檸茶 / 酸梅汁（3揀2）、紅豆豆腐花、貓抓焦糖布丁。

貓草茶、貓檸茶
老表十分好奇咩叫貓草茶，所以，揀咗佢，原來喺茉莉花茶再加啲椰果之類，味道清新，啲粒粒好QQ。我杯貓檸茶都唔錯，茶底都幾香，最讚喺加鴛鴦檸，即喺西檸同青檸。

酸辣爽脆木耳手拍青瓜

啱啱開爐未燒嘢食前，最啱就喺食啲冷盤前菜，套餐都考慮周到，包咗一款手拍青瓜，木耳同青瓜都好爽脆，而且，酸酸辣辣，辣度溫和，越食越開胃。

秘製西班牙豬五花
可以起動燒得喇，首發就俾咗啲豬五花先，因為睇見豬五花油脂滿滿，非常吸引。由於薄切，入口雖然油脂大爆發，但又唔會覺得好油膩，細嚼肉質確唔幾嫩，膽固醇萬歲。

全明星拼盤

叫得全明星，相信都用咗店家嘅招牌肉，更標明M5和牛升級版，自不然更有睇頭。成份拼盤有多款唔同部位嘅和牛，款款都雪花平均，底面都輕輕灼一灼，稍稍轉色已可以入口，沾上燒肉汁真喺一流，想感覺輕盈啲，沾上柚子汁亦唔錯。

除咗和牛，仲有照燒雞腿肉同新鮮小吊桶，前者估唔到比預期好嫩滑，後者燒過後雖然縮細咗好多，但口感柔韌，同樣好食。

重慶紅糖糍粑

燒到中段，嚟咗一客糍粑，因為薯餅較常食到，當然揀試糍粑啦。糍粑外脆內軟，咬落好糯，最鍾意喺佢淋上唔少紅糖漿同灑下不少黃豆粉，令食味升級。

海捕虎蝦
拼盤內有少少小吊桶，但記得明明落點揀虎蝦，擺明吊桶喺送嘅。講番啲虎蝦，隻隻手掌大，貨真價實，燒香之後，果然靚貨，入口彈牙有蝦鮮味，正呀喂。

咔吧雞軟骨

初頭一大堆嘢送嚟都無為意，直到燒呢碟時先發覺，又喺明明揀雞腿肉，但呢家就多咗碟雞軟骨，唔知喺額外送嘅定嚟錯咗，既然都放咗落盤燒，既來之，則安之。雞軟骨唔多肉，純粹過吓口癒咬咬吓。

蔬菜樂園 $32
初頭睇相以為個套餐少菜，所以，額外多點呢份「蔬菜樂園」，實際墊底都有唔少菜，不過，就主要得生菜，唔似呢個「樂園」，真喺有好多款式，記得落多少少油落去燒，否則好易燶。啲蔬菜燒過，跟平時灼菜、烚菜風味唔同，又跟炒菜有啲唔同，有少少焦香味，哈哈！

貓抓焦糖布丁、貓抓鮮奶奶凍 +$12

套餐本身包咗一客紅豆豆腐花及一客貓抓焦糖布丁，老表對鮮奶奶凍 感興趣多啲，所以，升級要鮮奶奶凍 。兩款甜品嚟到，絕對喺高打卡度，賣相萌到爆，非常可愛。味道方面，前者做得唔錯，既有蛋香，又滑溜，如果焦糖層做得厚身少少就更正；而後者質感挺身，略嫌奶味未夠重。

好老實，個套餐真喺好抵食，款式多，份量足，有冷盤，有肉有菜，有飲品，有甜品，食到我哋都覺得好飽，好滿足嘅一餐。

個人評分
味道：9/10
環境：9/10
服務：9/10
抵食：9/10
平均每人消費：HK$215

餐廳資料：
貓抓烤肉 Meow BBQ
地址：旺角豉油街104號XX Arcade東翼1樓
電話：3795 7885