新香冰廳餅店 Sun Heung Tea Restaurant：他「香」遇故知

幾年前同朋友行完「城門水塘」就落嚟「新香冰廳」食晏晝，今次都喺，同老表兩個由大圍經「下城門水塘」行返上去「城門」主霸，跟住再落返葵涌，亦都喺專登帶佢嚟試下呢間好有人情味嘅懷舊冰室，呢啲真正幾十年老店，依家真係買少見少。

鋪面擺滿一排排嘅麵包，因為佢啲都喺兼營餅店，而且啲麵包喺佢哋師傅即場新鮮製作，所以，都見唔少街坊嚟買麵包。入到裡面，一派懷舊冰室樣，尤其個水吧，講就唔多講，大家睇相都見。

呢度仲喺保持舊式裝修，無話咩枱側櫃桶，所有，調味料、餐具都放晒喺枱面一旁，自由取用。

餐牌除咗貼晌喺枱面玻璃下之外，其次就喺貼滿成間餐廳嘅牆壁之上，小弟就揀咗個特餐，而老表就喺午餐度埋手。

午餐：鮮茄豬扒飯 $45
雖然午餐只喺寫住奉送熱飲，但喺店家好慷慨，加送多個例湯，而是日例湯喺煲蓮藕，味道方面就喺大路嘢，不過你估佢唔到咁大碗，真喺兩個人都夠分。主角豬扒亦估唔到又加咗隻煎蛋，真喺買菜搭棵蔥，而且，件豬扒非常之大件，老表佢話入口鬆化，蕃茄汁都好唔錯，酸酸香香，味道唔會太假。

特餐：沙爹牛肉麵 $40

特餐嘅主食有四款口味，小弟就偏愛沙爹牛肉麵，麵底嚟嚟去去都喺茶記專用嗰啲，唔會有咩太大分別，煮得啱啱好都收貨，個沙嗲汁就好香濃，牛肉軟腍，份量仲好夠；此外，仲配埋多士搭餐肉、火腿、煎蛋，所以隻煎蛋就拼多士食，餐肉同火腿就放埋攞啲沙爹牛肉跟麵一齊食，喺好豐富嘅一份午餐。

熱奶茶

嚟到「新香」梗喺推介老表試飲佢哋嘅熱奶茶啦，因為上次飲過確喺唔錯。今次呢兩杯，睇睇色澤就幾對辦，不過，飲落茶味就淡咗啲，唔喺奶多嘅問題，喺唔夠茶香，你會覺得個茶底好似啲人唔夠貨賣，就加水沖多杯咁，個人覺得就唔合格。

雖然杯熱奶茶有啲失準，但其他嘢食就唔錯，加上人情味，好招呼，街坊價，我都仲會不時嚟幫襯吓，支持吓小區老店，要支持唔喺等人家結業先嚟做囉！

個人評分
味道：8/10
環境：7/10
服務：8/10
抵食：9/10
平均每人消費：HK$40

餐廳資料：
新香冰廳餅店 Sun Heung Tea Restaurant
地址：葵涌石蔭路58號地下
電話：2426 0255