山區裡的走走趯趯: 鐵板世家 Sizzling Group：「鐵」人理料

2024年11月19日星期二

鐵板世家 Sizzling Group：「鐵」人理料

講起豉油西餐，後生一代唔喺好知乜，但一聽就明，就證明你小弟咁，都喺有番咁上下年紀。早前晌太子食嘢，偶見呢一家「鐵板世家」，主打喺港式懷舊鐵板餐，之後再上網睇睇佢啲食評，感到好有興趣，所以，拉埋獨居老友嚟鋸吓扒。

雖然呢個鋪位唔喺咩幾十年老店，但喺裏面裝修格局好有回到以前嘅感覺，好有復古懷舊風，尤其是啲紅白格仔枱布，絕對喺七八十年代嘅標記。

佢唔喺咩茶餐廳，茶式唔會包羅萬有，但務求貴精不貴多，包括各款鐵板餐之外，就只有焗飯、焗意粉……等等。我哋嚟得目標清晰就喺港式鐵板餐。有一樣嘢好搞笑，坐低無耐，餐都唔好話未點，連食乜嘢都仲研究緊，侍應哥哥已經問你紅湯定白湯，相信點乜餐都包餐湯、餐包。

餐湯、餐包
叫得豉油西餐，揀紅湯白湯又喺另一經典，小弟就鍾意紅湯羅宋湯，因為酸香微辣好醒胃之餘，有大量蔬菜夠健康，飲落確喺好足料。跟湯送嚟呢一款餐包，真喺滿有情懷感，依家真喺唔多地方仲供應呢一款餐包。餐包非常之軟熟，微微暖，搽上牛油，配羅宋湯真喺經典中嘅經典。

鐵板肉眼牛扒拼豬扒 $128

呢度嘅服務好有香港人嘅特色，就喺快，兩份鐵板餐好快就送到上枱。我就多心少少揀咗肉眼拼豬扒配燒汁，啲燒汁淋落去真喺「咋咋聲」，好有儀式感，亦可見塊鐵板幾咁熱。無論件肉眼，還是豬扒，都非常之大件，下面放滿咗曲紋薯條，再有少少西蘭花、車厘茄伴碟，單睇外觀就好夠份量，而啲肉眼果然好夠腍滑，而且，有肉香，豬扒亦都好鬆化，沾上燒汁，確喺幾唔錯，百零蚊絕對物有所值。