Simplylife Foodplace：再領風「酥」

同事送咗盒星巴克嘅「掛耳」咖啡俾我，齋飲唔喺唔好，但搵件靚餅襯吓作為下午茶咁就完美喇。所以，趁呢日過開金鐘政府合署交文件，順便嚟到呢間「Simplylife」買件丹麥酥食吓。

之前都嚟過呢間「Simplylife」幫襯，知道佢一邊喺賣西餐嘢，一邊喺賣啲烘焙嘢。晌透明玻璃餅櫃嗰邊打個轉，一排排烘焙產品，牛角包呀、丹麥酥呀、蛋批呀、比高圈呀、各式麵包、英式鬆餅、三文治，選擇非常多，賣相極之吸引。

榛子丹麥酥 $23

上次試過玉桂卷，都覺得好唔錯，但今次就揀個榛子丹麥酥，賣相當相當亮麗，烘得外層金黃，中間夾有一大抹榛子醬，一口咬落去，口感極之酥脆，甚富牛油香氣，而中間嘅榛子醬榛子味濃郁，質感綿滑細緻，襯埋杯咖啡，真喺一流享受。

Simplylife，人生可以好簡單就得到喜樂、滿足 ，就好似今次咁，一件美味嘅丹麥酥，一杯醇香嘅咖啡。其實人生唔使搞咁複雜嘅，只不過喺因為人有太多永無止境嘅貪念、慾望，先至唔滿足，產生咁多愁煩啫。

個人評分
味道：8/10
環境：8/10
服務：9/10
抵食：8/10
平均每人消費：HK$23

Simplylife Foodplace
地址：中環花園道三號冠君大廈6號舖
電話：2537 9190