山區裡的走走趯趯: 蘇山雞飯 Susan chicken rice：再領風「蘇」

2024年4月24日星期三

蘇山雞飯 Susan chicken rice：再領風「蘇」

小弟本身都幾鍾意食星馬菜，所以，以菜系而言，星馬菜確喺相對食得多。而呢一間「蘇山雞飯」長沙灣分店好耐之前都曾經嚟過，無論質素、價位都好啱心水，趁今晚無飯開就約咗住晌附近嘅表哥落嚟聚一聚，食餐星馬菜。

環境就唔太多講，因為上次食評都有交代，簡單而言，地方夠大（分左右兩邊），地磚、裝修都帶點馬拉懷舊茶室風，啲卡位又寧舍大張闊落，舒服好坐。

簡單嘅調味料、餐紙及餐具放晌枱邊，而呢度都喺用二維碼落單，合介面都易用，相信大家都熟晒點搞，不過，如果加配咖央多士一環可以加多欄「後上」就更貼心，唔使另外再同侍應講。

由於二維碼落單，所以，都無問佢哋拎餐牌睇，好在臨走時見收銀旁有啲外賣單張拎，加上時隔年半，價錢都有所轉變（睇落無乜太大加價），掃瞄晒出嚟俾大家參考一吓。菜式嘅選擇由午餐、下午茶、招牌雞飯、推介、湯粉、蔬菜、小食、特色飲品到甜品，都充滿星馬風味，又有多種加配優惠，仲要無加一添，唔怪得咁多街坊幫襯。

黑白雞飯 $93

第一次去長沙灣店就食咗招牌菜「獅城芽菜走地雞飯」，第二次去太子店就試新嘢「牛車水醬油雞飯」，今次嚟見有款「黑白」，啱晒啦，一次過俾表哥試晒兩款招牌雞，仲配上雞雜清湯、雞油飯。一整盤套餐送上嚟，賣相吸引。

個湯幾清甜，裡面有啲冬瓜同雞腎之類，味道唔錯；而個雞油飯有別平常所見，比較深色，上次已問過店員，知道煮雞時加入啲日本花菇、元貝、多種香料增味，加埋啲雞油、斑蘭汁去煲個飯，自然色香味全。

先試「白雞」，食落雞皮好爽，皮下脂肪又少，啲肉嫩滑鮮味，去晒骨，啖啖肉；試埋「黑雞」，似似哋豉油雞，濃郁得嚟帶點甜味，同樣皮爽肉嫩。佐食嘅3款醬汁：薑蓉、秘製辣醬、黑醬油，夠晒傳統、地道。

巴東牛肉配江魚椰漿飯 $85
印象中都好耐無食過巴東牛肉，所以，呢個我就想試一試，碟飯仲配咗隻滷蛋同好多花生粒、江魚仔，而個椰漿飯加咗班蘭汁去煮，一身青綠，不過，班蘭本身嘅味道唔強，煮出嚟嘅飯都唔會話食到好大陣班蘭味，但勝在賣相吸晴，最緊要喺飯粒分明，入口軟熟。

至於「黑掹掹」嘅巴東牛肉，咬落極之鬆化，除肉香，仲滲出複雜嘅香料味，再帶少許辣勁，夠惹味，確喺有質素。

鹹魚蓉怡保芽菜 +$23
加配咗一碟菜，之前試過「參巴醬通菜」，今次就介紹表哥試試怡保芽菜。大大碗幾足份量，啲怡保芽菜肥嘟嘟，多汁爽脆，加上鹹魚蓉自然添幾份鹹香惹味感，不過，個人嚟講，再加多啲就仲好。

冰爽砂拉越菠蘿冰 $48

小弟向來都鐘意飲菠蘿冰，晌網上見到呢個「菠蘿冰」就更加想試，單喺原個菠蘿咁上，仲加多一大片菠蘿圈，已經贏晒焦點，無得輸。有別茶記嘅菠蘿冰，佢實際喺沙冰嚟，打得細滑，飲落唔會有碎冰感，冰度啱啱好，無過冰嘅問題，每口都滿滿嘅菠蘿清甜香味，飲得出真材實料嚟。依家開始天氣熱番，更加「應節」，溫馨提示一吓，成個菠蘿沙冰份量堅多，一個人真喺飽到上頂，建議兩個人「些牙」就仲好。