叙苑粉麵茶餐廳：「叙」首一堂

因為要過嚟「鑽石山殯儀館」出席喪禮，而喪禮 就正正晌中午舉行，喺簡單嘅告別儀式，完咗之後同個朋友順向鑽石山方向落去，大家對食無乜太多要求，純粹就腳，就嚟咗呢間「敍苑粉麵茶餐廳」食個晏。

其實「敍苑」喺慈雲山都有一間分店，好多年前都幫襯過一次，印象都喺一般般。入到去，環境非常之大，啲位都好闊落，相信都開咗好多年，裝修已變得有啲舊。我哋就啱啱好搵到個角落卡位，淨淨侷食吓飯，傾吓近況。

餐牌就隨意影，而午市有供應嘅選擇都不外乎碟頭呀、粉麵呀、午餐呀、快餐之類。

花生豬手飯 $56

老友原本想食梅菜蒸鯇魚飯，但竟然乜魚都賣晒，所以改咗食呢個豬手飯，豬手都成5件，不過，就唔喺好大隻，味道佢就話OK，都算鹵得入味，反而飯量就多得驚人，但老友好犀利又食得晒喎。

牛筋丸河 $47

小弟就輕怡少少，揀咗個粉麵，份量方面跟出面啲粉麵店差唔多，啲河粉都幾滑溜，湯頭都唔錯，不過，啲牛筋丸就爭少少，咬落去未叫得做好爽口，有少少溝粉嘅感覺。

熱奶茶

嚟茶記就照慣常嘆返杯熱奶茶，因為普遍嚟講都唔會差得去邊，咁老實講，佢杯熱奶茶都算唔錯，茶底都叫幾芳香，喺柔滑度爭啲啲。

因為餐廳本身客人唔多，所以，食完都唔趕你走，可以慢慢坐，阿姐仲收拾好晒枱上碗碟，抹一抹乾淨張枱添，咁我哋又坐得舒服多少少。

個人評分
味道：7/10
環境：7/10
服務：7/10
抵食：7/10
平均每人消費：HK$47

餐廳資料：
叙苑粉麵茶餐廳
地址：鑽石山斧山道宏景花園商場地下
電話：3165 1387