串本屋 Skewers House：「串」步不讓好滋味

上次同老婆嚟到佐敦渡船街一帶食日本菜，正正就喺佢上完咗興趣班嘅日子，今次又喺一樣，趁佢又完咗興趣班嘅一個循環，再嚟到渡船街一帶食日本菜，不過就唔喺上次嗰間，試試另一家風評上佳嘅「串本屋」。

睇個名都知喺走居酒屋嘅路線，入到餐廳，都喺一派和風小店嘅格局，地方就唔喺好大，裝潢簡約，牆上就擺放咗多幅日本風情畫作，而啲布梳化椅就幾好坐，好舒服。

作為居酒屋，食物自然有好多選擇，翻一轉主餐牌，類別而言已有十多種，夾夾埋埋嘅菜式估計都5、60款，真喺有啲花多眼亂。都唔一一細寫，自己睇睇就可以。

此外，仲有多款定食、串燒組合，而定食都會奉送麵豉湯及沙律，更有多款飲品、小食加配優惠。 補充一點，除咗收加一，另外每枱都要收$12蚊前菜費。

餐廳採用二維碼落單，都好易用，裡面更有埋圖片做參考。其實，依家好多餐廳都喺咁，不過，眼見好多客人都喺搵侍應落單。

前菜 $12
好多居酒屋都會收呢個前菜費，所以，都唔喺咩新奇事。今次所見嘅前菜喺蕃茄漬，蕃茄本身都幾鮮甜，漬過之後，酸香開胃， 作為前菜，輕怡清爽，都幾好喔。

香烤鱈魚乾 $18
老婆誤會咗喺烤雞泡魚乾，所以，入口時佢話點解咁脆嘅，佢心諗喺想食口感煙韌有咬口嘅雞泡魚乾。不過，佢話呢個鱈魚乾又幾特別，口感超脆，脆到咯咯聲，好似食薯片咁，但就健康好多啦。

雞肉串配紫蘇梅子醬 $28、荔枝豚肉串 $28

屋酒屋啲串燒一向都了得，所以，我哋亦試咗其中兩款，先分享雞肉串，肉質嫩滑，唔會乾嚡，最正喺個醬料，獨特嘅紫蘇香，再帶陣陣梅子嘅酸香味；另一串豚肉串都好正，睇落真喺幾肥吓，入口充滿油脂香，真喺膽固醇萬歲，而夾住嘅荔枝肉，爆汁清甜，正好補番個平衡。

麵豉湯、沙律（定食）
簡簡單單嘅麵豉湯同沙律喺好多時日式定食嘅指定組合，個麵豉湯唔錯，濃而不濁，內裡有唔少昆布；沙律菜爽脆，淋上柚子醋，已喺好清爽滋味。

雜錦烏冬鍋 $118
今日賀老婆上完堂，當然，揀兩款主食都喺佢嘅心水嘢啦，先登場喺個烏冬鍋，烏冬喺佢嘅「飛弗」食材。睇樣就見非常足料，有大大隻天婦羅蝦、雞肉、金菇、昆布、冬菇、鳴門卷，仲有大大隻月見（生雞蛋），樣樣食材都好食，而啲烏冬好滑溜，口感帶點韌勁，非常好食，將雞蛋跟烏冬撈勻，更加正，最後，連啲湯都清埋一滴都無嘥。

銀鱈魚西京燒配飯 $168
另一款佢好鍾意嘅日本食材就喺銀鱈魚喇，一客有兩大件銀鱈魚，佢就滿足晒啦。件銀鱈魚燒得外皮焦香，肉質細緻嫩滑，極富油香，絕對喺高質素嘅貨色，沾上少少沙律醬，風味更佳，而珍珠米口感黏糯，面頭仲加咗唔少飯素，增添風味。

有咗柯士甸站，對我哋嚟講，過嚟真喺好方便。食到心水嘅食物，固然開心，加上出品有水準，店員招呼殷勤，實在喺賞心樂事。

個人評分
味道：8/10
環境：7/10
服務：7/10
抵食：8/10
平均每人消費：HK$205

餐廳資料：
串本屋 Skewers House
地址：油麻地渡船角文蔚街5號文苑樓地下A號舖
電話：5287 6567 (Whatsapp)