La Parrilla Steakhouse：滋味午餐好味食唔「廷」

阿根廷菜晌香港嚟講，相對比較冷門少少，而小弟對此亦認識唔多，其實，喺對所有南美國家嘅菜式都一樣，所知嘅甚少。今日就同晌中環返工嘅舊同學午聚，嚟到「La Parrilla Steakhouse」嚐嚐阿根廷菜，兼分享下近來生活點滴。

餐廳位處雲咸街一幢商廈1樓，走進餐廳，一室都喺深色木系裝修，就連天花都做成仿木屋嘅感覺，加上好多紅色仿磚牆，再有唔少富南美色彩嘅壁畫，確實甚具地道風情。

此外，近窗一排嘅「走廊位」，配以高腳枱櫈，對正就喺「大館」，景觀甚為開揚。若天氣涼爽，窗戶可以打開，變得有種「露天茶座」嘅感覺。

而餐廳尾尾，就喺開放式扒爐，睇到師傅即場烤扒，不時陣陣火光，滋滋聲響，甚有氣氛。

此外，餐巾、餐刀、餐碟，以及黑胡椒罌、鹽罌 都睇得出餐廳嘅級數，絕對唔喺馬馬虎虎。

雖然，午市如常提供所有散點菜式，但當然嗌午市套餐為划算啲。午餐分兩個價：$219、$298，同樣包咗前菜、主菜、配菜及飲品，但前者主菜會喺一啲烤雞、意粉、是日魚鮮之類，而後者主菜會喺幾款招牌牛扒，唔介紹花多啲，仲可以升級 其他靚部位。此外，亦可以加錢轉其他飲品，或加配甜點。

Focaccia
一坐落，點好餐之後，就會送上自家製意大利香草包，呢款包喺小弟最鍾意食嘅包款之一，因為除咗落重香草，加咗唔少橄欖油之外，面頭仲會灑上鹽粒，所以食起嚟好有風味，而且，個包真喺好軟熟。

Soup of the Day

前菜方面，舊同學就喜歡飲個湯，是日餐湯喺南瓜忌廉湯，我就無試到，不過佢話做得相當好，一來南瓜味好濃郁，二來個質感唔會太杰身，口感非常之順滑，合晒佢口味。

Empanada de Came Criolla
我就揀咗呢個比較有多啲地道風味嘅免治牛肉餡角，件餡角非常之大，有成隻手掌咁大，外皮非常之酥脆，而裡面填滿咖哩免治牛肉，香濃惹味，佐以帶辣嘅蕃茄莎莎，夾埋一齊食特別醒胃。

Grilled Spatchock Chicken

主菜我哋就一齊「些牙」嚟食，兩個主菜都喺同步上枱，先介紹個烤雞，因為用明火烤，烤得特別靚仔，有少少燶皮，而外皮確喺燒得幾香脆，啲雞肉亦都非常之嫩滑，沾上感覺有南美風味嘅醬料，味道酸酸香香，襯燒烤嘢食真喺好夾。

Beef Ragu

另一個主菜喺紅酒燴牛肉意大利麵，牛肉食落口感非常之鬆化，而且，確喺嗒得出陣陣紅酒香，好入味，份量又夠足；意大利麵用上扁意粉，煮得有咬口之餘，仲好掛汁，淨食啲麵條都一樣咁正。

Field Green Salad

伴菜嘅沙律份量都唔少喎，裝成一大兜，而且，絕對唔喺求其得少少沙律菜，而喺襯上好多唔同嘅蔬菜，例如櫻桃蘿蔔、青瓜、紫洋蔥、車厘茄……等等，簡簡單單淋上油醋，清新好味，正好平衡番啲主菜中嘅肉食。

Potato Au Gratin
呢個奶油焗薯仔正呀喂，點正法？就喺夠多奶油，口感非常香滑，啲薯仔夠軟腍，又好有薯香，不過老實講，如果一個人食，真喺會覺得好「漏」，兩個人一齊共享就好啲。清晒啲薯仔，已經食到我哋好飽。

Coke、Ginger Ale

今日食嘅嘢都夠濃味，配汽水就好唔錯，都唔需要加錢嘆咖啡。小弟就揀咗Ginger Ale，冰涼清爽。

雖然賣到二百幾蚊一份午餐，但好足份量，用料又具質素，其實，唔太大食嘅人，嗌兩份，3個人都夠食呀。

個人評分
味道：8/10
環境：8/10
服務：8/10
抵食：8/10
平均每人消費：HK$240

餐廳資料：
La Parrilla Steakhouse
地址：中環雲咸街77號嘉兆商業大廈1樓
電話：2637 8555