Artco 33：性價比 • 高

適逢表哥星期六放假，同佢行轉短山，再落荃灣食晏，講明短山盡量兩個鐘頭之內完成，等佢輕輕鬆鬆舒展下筋骨，再搵個舒舒服服嘅地方食晏就最妥貼，所以，揀咗嚟「雅高·33」食餐豐富午餐。

餐廳環境幾唔錯，左右兩邊好多卡位，而且啲卡位好闊落，絕對唔似有啲茶餐廳嗰啲逼逼夾夾咁，就算我哋兩個人嚟到都安排咗張四人枱，再者呢度樓底高，所以，空間感十足，對街一邊喺大玻璃窗，透進陽光，感覺非常舒適，無怪乎午市時段見到唔少家庭客、街坊客嚟幫襯。

午市主要都係供應套餐，基本上有兩大系列，一個喺基本嘅午餐系列（$50-$80），另一個喺商務午餐系到（$101-$123）。睇個名你就知道一個平啲，一個貴啲而已，所以，豐儉由人。而午餐包咗餐湯、餐包、餐飲，如果想轉特飲加$18，又可以加配小食，最好嘅喺午餐唔收加一。

另外，門口有啲外賣單張攞，就貼埋出嚟俾大家參考，有齊晒早餐、午餐、下午茶、晚餐，以及各類散點菜式，如餐前小食、主菜、意大利飯、意大利麵、薄餅……等等，仲有多款紅白餐酒。

餐湯、餐包
前者喺港式羅宋湯，味道酸酸香香，酸味嚟得自然，帶微微辣，但口感比較清爽俐落，唔似一般茶記用茄膏去推嘅過濃，大熱天時飲都幾唔錯；後者雖然餐牌話喺牛角包，但依家喺港式餐包，裡面已搽咗牛油，亦都烘到暖笠笠，口感好鬆軟，不過唔食牛油嘅客人就要預早揚聲。

香煎澳洲肉眼牛扒 $123

之前都睇過人哋嘅食評話呢度啲份量好大，果然真喺份量十足，你睇件肉眼大塊到遮住大半隻碟，而且，有番咁上下厚度，表哥話肉質非常之軟腍，又足肉味，果然喺澳洲貨色，配上香蒜汁 更喺份外滋味。此外，啲蕃茄汁底嘅意粉都做得唔錯，煙韌有口感，又掛滿醬汁，一啲都無hea做，仲多到佢話差啲食唔晒。

香草烤西冷羊扒配法式芥末醬 $123
難得有羊扒供選擇，小弟梗喺揀佢啦，唔喺講笑 ，件烤西冷羊扒成舊磚頭咁大嚿，真想磅吓佢有幾重，估計都有10安士呀！最正就喺烤到好多燶邊位，又非常有炭香嘅感覺，落刀已感受到嗰份軟熟感，睇見裡面仲帶少少嫩粉紅色，烤得恰到好處，食落有羊嘅獨特香氣，但唔喺好羶，相信大部分人都接受到，再沾上芥末醬，食味更上一層樓。我就唔想食太飽，所以配薯菜，薯條炸得 金黃香脆，沙律菜拌上胡麻醬，有個平衡。

雜果賓治 +$18
今日天氣有啲熱，所以，我哋兩個都揀凍飲。表哥就點咗特飲嘅雜果賓治，橙紅色嘅石榴糖水OK，無過甜，飲落又夠晒冰涼清爽，底下有好多雜果粒粒，有得飲又有得食，讓人暑氣全消。

凍咖啡 +$3
雖然再嗌甜品，但我就一樣嘆返杯凍咖啡。佢哋嘅咖啡都喺啲即磨貨色，所以唔差得去邊，入口幾醇香，仲帶少少甘苦味，真喺唔錯。

見門口都有人等位，所以，我哋食完就走，無謂掗住人張張枱。綜合而論，環境舒服，招呼妥貼，食物具質素 ，定價同一般西餐廳差唔多，所以性價比都相當高。

個人評分
味道：9/10
環境：8/10
服務：7/10
抵食：9/10
平均每人消費：HK$133

餐廳資料：
Artco 33
地址：荃灣沙咀道328號寶石大廈地下21號舖
電話：2341 1388