名世鮮小廚：「名」過於實

呢間舖前身喺間西餐廳，早幾個月前轉手做咗茶記小廚，襯完咗聚會就同老婆、一位朋友嚟到食餐晏晝。其實喺附近都有好幾間茶記，已經算喺好大競爭，佢個位仲要偏埋一邊，相信有啲法寶先能夠做得住。

由於餐廳喺接上手繼續做，所以，內裡嘅環境無變，依舊喺西餐廳嘅格局。無論絨櫈定藤椅，都算舒服好坐，不過，燈光有啲暗，但我哋揀咗窗口位，所以，影響唔大。

午市時段，可揀嘅有常餐、碟頭嘢、炒粉飯麵、泡飯、焗飯……等等，都喺茶記慣常見到嘅選擇。雖然呢度嘅招牌喺海南雞飯，不過，老友話食過 覺得麻麻哋，所以，我就試咗另一款沙薑雞飯。

刀叉、筷子放咗喺枱邊嘅藤藍，仲有少少基本調味料，順帶一提啲服務，態度就真喺麻麻哋，尤其是有位女侍應，成碟炒貴刁掟落枱面嘭嘭聲咁 ，唔喺誇張，我哋都O晒咀，但另外一位男店員就好好多。

乾炒牛河 $58

呢度最可取嘅份量非常十足，無論邊一碟，我哋所叫嘅碟頭都大大份，而朋友所叫嘅牛河，睇樣就好對辦，色澤都炒得好靚好，味道亦唔錯，牛肉好腍滑，只喺嫌油咗少少。

馬來炒貴刁 $58
老婆嘅炒貴刁都算喺炒得有水準，唔單止料多，都炒得好「勻巡」，味道帶少少咖哩香，食落好惹味，不過份量真喺超大，我幫佢頂咗1/3碟有多，哈哈。

招牌沙薑雞飯 $58

初時諗住啲雞就咁斬就上到碟，以為喺我最快有得食，但估唔到佢哋食咗一半，我碟嘢都仲未見影，相信喺漏咗單（喺女店員落單），追問嘅時候，個男店員就話整緊，需要啲時間，感覺有啲奇怪，因為你嗰啲雞嚟到唔喺好熱咋喎。貴為招牌，點都會有啲期望，佢哋啲沙薑喺另外碟上，好似做個汁咁淋落啲雞度，雞肉都算唔錯 ，雖未至於好嫩滑，但至少唔會「嚡烚烚」，不過稍嫌皮下脂肪多，個沙薑調校都有少少鹹。

熱奶茶
餐飲都喺嘆返杯熱奶茶，話晒呢度算喺茶記，估計唔會太差。色澤幾好，入口茶底唔錯，算芳香，但以個人口味而言，茶奶比例差啲啲，唔夠奶香，口感亦唔算順滑，唔差，叫OK咁啦。

餐廳名用上「小廚」，感覺以小炒做定位，唔知啲小炒會唔會好啲呢，不過，就無打算再嚟，皆因附近有幾間茶記就較為心水！

個人評分
味道：7/10
環境：7/10
服務：6/10
抵食：7/10
平均每人消費：HK$58

餐廳資料：
名世鮮小廚
地址：葵涌石文徑1號葵英樓地下10號舖
電話：3954 5397