一起食堂 Eat Together：食得「起」樂

呢晚老婆有聚會，所以，捉個老死出嚟陪我食餐晚飯，就番我收工方便，揀咗晌中環嘅「一起食堂」快閃一餐。大家傾開近排身邊都有好多朋友中新冠，不過，我哋兩個托賴就仲未做，但講笑咁講，都喺只不過遲早嘅問題。

其實從門面都見到，鋪內格局窄而深長，一室天空藍配以木系枱櫈，天花掛上特色嘅竹籮燈罩，牆上又有唔少台灣電影海報作點綴。始終小店格局，人多起上嚟就有少少逼，不過，見店員都盡量做到啲客人分開坐、隔住坐。

點菜紙就喺餐牌，一頁睇晒各種食物同飲品，包括麵類、飯類、小吃、台式飲品、甜品；另外，更有幾款夏日嘅季節限定新品，而小弟就睇中其中柚子風味嘅冷烏冬。

仙草冬瓜茶、愛玉鳳梨綠茶 @$28
老死就揀咗杯冰涼嘅仙草冬瓜茶，因為佢都幾鍾意飲冬瓜茶，夠清潤，加上滑嘟嘟嘅仙草，味道又無過甜，合晒佢心意。因為早幾日先飲完珍珠奶茶，所以，小弟今次揀杯清爽啲嘅愛玉鳳梨綠茶，綠茶茶底幾清幽，滲出陣陣鳳梨香氣，添加一份清爽感，再加上裡面有好多愛玉，飲下、啜下、夠過癮！

蒲燒鰻魚飯 $112

老友原本諗住揀原鰻魚飯，但都驚會食得「漏」得滯，所以，改要個正常版，但其實呢一款嘅鰻魚份量一樣唔少，佢覺得咁仲啱啱好。確實啲鰻魚燒得好香濃，肉質肥美嫩滑，仲有少少彈牙感，但又唔會話食到好膩，再伴有成隻溫泉蛋，篤開蛋黃湧流而下，加上啲珍珠飯飯粒分明軟熟 ，兩者撈埋，食味極之一流。

吉列海鮮冷烏冬拌柚子汁 $89

冷麵食得多，但冷烏冬印像中好似真喺未食過，加上近排天氣又熱返，有啲初夏嘅感覺，所以就更加想試呢個冷烏冬。烏冬麵煮得煙韌咬口，淋上柚子汁，就更帶有一份酸香清新味，佐以蔥花、醃蘿蔔，味道更加清爽；而吉列蠔同蝦兩者都炸得外層非常之香脆，唔油膩，蠔味鹹鮮，蝦味鮮甜，真喺高水準。

芋圓仙草凍 $42

最後追加一份甜品，份量比預期中多喎，有成一大碗，剛好喺夠晒兩個人分嚟食，作為飯後甜品就啱晒。除咗三色芋圓（地瓜、香芋、紫薯）、仙草，仲有啲紅豆，淋上花奶。啲芋圓柔韌Q彈，仙草好滑溜，紅豆既清甜，又軟綿，食埋個甜品，飽晒。

不論主食，還是飲品、甜點，的確喺做得有水準，難怪有咁多人幫襯，其實中環晚市喺可以靜得交關。此外，服務亦好稱心，甜品無要求都醒目咁自動後上，出面有啲餐廳唔喺架，落咗單就乜都嚟晒，唔分次序。

個人評分
味道：9/10
環境：7/10
服務：8/10
抵食：9/10
平均每人消費：HK$150

餐廳資料：
一起食堂 Eat Together
地址：中環域多利皇后街2號地舖
電話：6722 1639