麗豪酒店聚賢廳 The Forum：宴會廳嘆午餐

生活趨向復常，自不然好多大型活動都會如常番，今日就嚟到「麗豪酒店」食自助午餐，不過，就唔喺晌「濠餐廳」，而喺包咗成個宴會廳「聚賢廳」，足足二百幾人聚首一堂。今次就借咗「濠餐廳」個版位嚟出文，其實，相信都喺出自同一個廚房。

比起「濠餐廳」，呢度會坐得舒服好多，除咗地方大，樓底又高之外，枱與枱之間都排得闊落啲，而且，全都喺圓枱，方便大家傾偈。明顯，個場其實喺俾人擺酒或搞大型活動用。

因為小弟喺是日車長，要安排帶大家入座，所以，未有機會第一時間影低啲食物全貌，都喺盡量影，有幾多就影得幾多，總括而言，同晌「濠餐廳」食到嘅肯定有啲分別，至少喺少咗凍海鮮、即煮粉麵之類。食物區分開幾邊擺，晌宴會廳內，左邊角落有沙律、冷盤、熱湯、烤切肉，而右邊角落有甜品、雪糕同飲品。

而晌宴會廳外嘅走廊，就擺咗十多款中西式熱盤，大致上都叫樣樣都有啲。雖然喺自助餐，但小弟就自製咗四道菜午餐，睇睇下面就知點解。

此外，仲加送每枱一大盤刺身拼盤， 包括吞拿魚、三文魚、希靈魚，不過，個人覺得有啲嘥，因為今次活動上年紀嘅人偏多，唔多會食生冷嘢 ，好似我哋呢枱，就食剩超過一半，反而索性將啲刺身擺返喺出面啲食物枱，隨心夾會仲好啲。

第一碟（頭盤）

小弟慣性食自助餐嘅首發，就喺冷盤、沙律，作用都喺開開胃咁，再順便夾啲芝士、乾果，擺得大堆頭啲，啲食材都算喺新鮮，預製沙律亦唔錯 ，所以，算喺有個好開頭。

第二碟（餐湯、麵包）
食完生冷嘢，最好飲碗熱湯啦，所以，跟住就喺麵包配熱湯，加啲生果，再加個迷你葡撻。餐湯有中湯、西湯，後者好受歡迎，可能喺南瓜湯掛，推得真喺幾滑溜，配個歐陸小麥包，歐洲人已經喺當一餐架喇！

第三碟（主菜）
再嚟嘅就喺各類熱食同烤肉，樣樣都試少少， 夾夾埋埋都夾咗好多嘢，有烤肉眼、 泰式紅咖哩 豬頸肉、紅酒燴牛肉、香煎鱸魚、燒豬腩、烤意大利黃瓜，烤雞脾菇……等等。整體而言，級數屬中規中矩嘅款式，即喺無咩亮點，叫做味道不過不失，無話嘩一聲好好食，亦都唔叫得差。

第四碟（甜品）
擺放出嚟嘅甜品款式唔喺好多，但都不時會轉款 ，整體嚟講都喺啲大路嘅款式，絕對唔會有咩驚喜，純粹志在過下甜品癮而已，反而亮點喺啲Movenpick雪糕，一口氣食咗兩杯，之後再嘆埋杯咖啡，咁就圓滿喇！

實際就唔知酒店收幾錢位，所以，好難講今餐抵唔抵，但其實同場出席嘅人都喺志在大家高興一番。講番啲服務，其實見啲侍應都好落力，食物質素雖然唔喺好高檔次，但都都補充過不停，算喺咁架喇。

個人評分
味道：7/10
環境：8/10
服務：8/10
抵食：7/10
平均每人消費：HK$180（非正價）

餐廳資料：
麗豪酒店聚賢廳  The Forum
地址：沙田大涌橋路34-36號麗豪酒店2樓
電話：2132 1040