新泰東南亞餐廳 Sun Thai Restaurant：渾「新」解數

今日入到嚟馬鞍山玩，同老婆有個小旅行，先晌「新港城中心」睇場早場（男兒當入樽），平吖嘛，再晌附近食個午餐，然後上「鞍山探索館」兼嘆杯咖啡，最後上埋昂平欣賞吓西貢碼頭一帶全景。晌「新港城中心」同「馬鞍山廣場」兜咗個圈，最後決定嚟到「新泰東南亞餐廳」食嘢，一來東南亞嘢有啲特色，二來啲午餐都喺賣$75一客，唔貴喎。

晌門口望落，裝修已好東南亞風，走進餐廳，環境闊落之餘，正中間喺一大排卡位，寧舍寬敞。佈置上更充滿泰式風情，例如牆上大象嘅壁畫啦、一啲小擺設啦、燈飾啦，卡位放上咕臣，其他座位加入藤織元素。

左右兩邊亦好大，更擺放啲大型8人圓枱，方便傾偈。大部分員工都似喺泰國人，因為聽到佢哋之間溝通都喺講泰文（我估喺喇），但你又放心，佢哋又識講廣東話，完全無溝通障礙，仲非常有禮貌，感覺如置身晌東南亞一樣。

主餐牌有非常多選擇，雖然喺嚟食午餐，都貼出嚟俾大家參考。話就話東南亞餐廳，但主力都喺泰菜！

而午市套餐每款只賣$75，一共有7款選擇，並包一杯餐飲。此外，有加配小食、炒菜優惠，以及飲品升級。另外，仲有二人及四人套餐，可以食得豐富啲。

椰香青檸海鮮湯粉絲 $75

呢個組合真喺啱晒我老婆呀，所以，一打開餐牌就揀佢。大大碗奉上，份量十足，先飲啖湯，真喺幾鮮、幾正，既有椰子香味，又有青檸嘅酸香，好「泰式」風味；海鮮料亦唔少，尤其啲鮮蝦，爽彈到不得了，魷魚亦好柔韌，蟹柳食得出唔喺啲勁溝粉平嘢，加上啲粉絲入口滑溜，老婆好滿意呢道菜。

南瓜咖喱帶子焗飯 $75
呢個組合就喺食正我心水，咖喱飯一向甚有銷路，由於喺即叫即焗，所以，等候時間要多啲。出嚟嘅成品好吸引，熱焫焫，一片橙紅，因為飯底似喺加入南瓜汁，不過，咖喱味比較強，所以，南瓜味稍稍變得隱若，但整個飯撈勻，仍然好好食；而帶子喺鮮帶子嚟，仲大大隻，雖然只得兩隻，但味道鮮甜！

飛天通菜 +$28
老婆鍾意多食菜，所以，見有加配，就點多一碟菜食吓。份量就比預期少咗啲，但炒得有「鑊氣」，非常香口，陣陣鹹香味，炒得啲菜又爽口，唔錯！唔錯！

龍眼冰 +$8、熱檸水

襯番個焗飯，所以，揀咗龍眼冰，亦喺小弟食泰菜嘅不時選擇。個糖水底好清潤，甜味幾純香自然，而龍眼一食就知唔喺罐頭貨色，有種蜜香，兼且落得一啲都無手緊。入口冰涼，又可以解解咖喱嘅辣度。

雖然只喺試咗兩個午餐，但食落有質素，再睇睇，原來市區都有分店，下次有機會，可以約埋三幾個朋友去食番餐，再試多啲唔同嘅菜式。

個人評分

味道：9/10
環境：8/10
服務：9/10
抵食：9/10
平均每人消費：HK$98

餐廳資料：
新泰東南亞餐廳 Sun Thai Restaurant
地址：馬鞍山西沙路608號馬鞍山廣場2樓259及260A號舖
電話：2327 2199