新龍騰閣燒臘飯店：人情味「龍」

完咗早上嘅聚會，因為下晝仲有另一場聚會，所以，要快閃食個午餐。今次就唔揀茶記，由朋友帶我去試試呢間「新龍騰閣燒臘飯店」，佢話呢間啲燒味質素有一手，喺佢嘅飯堂之一。

入到去，鋪仔細細，真喺座位唔多，因為呢類燒臘飯店，主力都喺外賣使，俾啲人斬料拎返屋企加餸。內裏嘅裝修都喺舊一派嘅，而幫襯嘅客人 都喺熟客或街坊居多。

餐牌一大個貼晌牆上，都喺大家耳熟能詳嘅燒味，而定價嘅範圍都好大，平嘅有雙拼飯餐，$44啫，貴嘅大脾拼飯餐，最貴可以去到$110，如果轉燒鵝亦需另外加$16，飯品包一客例湯，如果唔鍾意飲湯，亦都可以轉港式飲品，但需另外價錢。

燻蹄燒鵝飯加例湯 $60
老友就唔介意加錢食燒鵝，因為佢喺識嘆之人，因為我無問佢太多詳情，所以，貼張相就算啦。不過，佢介紹得我試嘅，都喺有番咁上下質素，唔會叫我陪佢一齊伏嘅，此外，呢度啲飯量都好多，一大碗咁，肯定夠飽肚。

叉燒燒鴨飯加熱奶茶 $46
因為轉燒鵝覺得唔喺好划算，反正我食燒鴨都OK，就配叉燒雙拼。叉燒有肥叉、瘦叉、半肥瘦，呢度都好多彈性，揀咗瘦叉，啲叉燒真喺好靚仔，咬落去好鬆化，唔會好似柴乾咁，又有少少燶邊位，調味啱啱好，富蜜香，而燒鴨都唔差 ，好有油香，沾上少少冰梅醬，去膩一流。

睇樣呢度應該喺好家庭式作業，同埋都喺好老一派嘅管理，但就人情味搭夠。個阿姐招呼得幾好，成日問我哋使唔使要多啲醬呀，總之多謝老友帶我嚟試到啲高質素嘅燒味。

個人評分
味道：8/10
環境：6/10
服務：7/10
抵食：8/10
平均每人消費：HK$46

餐廳資料：
新龍騰閣燒臘飯店
地址：葵涌青山公路452號地下
電話：2422 7340