礦工Café：唔使曠工，亦飲到礦工咖啡！

前文是要吓先，是日請咗假，同老婆入嚟馬鞍山小旅行，睇場早場，食過午餐，就上「鞍山探索館」參觀，原打算之後繼續上，到昂平欣賞西貢海一帶美景，可惜，天公不造美，啲雨越落越大，故此，參觀完探索館部份，就過咗隔離嘅「礦工Café」打躉，等雨停。

「鞍山探索館」主要介紹馬鞍山鐵礦場嘅歷史同變遷，詳細資料就唔講喇，自行上官網睇已有好多資訊。而教堂右邊喺主禮堂，以前喺作崇拜之用，活化後成為博物館，好值得入去參觀。

而左邊就喺咖啡店，環境好似昏昏暗暗，咪就喺模擬緊礦坑環境囉。所以，最大亮點就喺環境上加入咗好多礦場元素，例如壁燈、手提火水燈、坑道員工名牌、規則通知……等等，非常有趣，如果細心睇，甚至就連天花都喺。

近收銀嘅一旁，仲有少少「鞍山探索館」嘅紀念品，例如T-shirt、環保袋、特色礦場餐具。

晌裡面，一室咖啡香，就睇睇飲品、食物有咩選擇。飲品方面，主要都喺一系統意式咖啡，此外，仲有啲茶品、朱古力及梳打；而食物方面，包括一啲港式小食、曲奇、饅頭、豆腐花、杯麵……等等。由於食咗晏無耐，所以，都喺嘆杯咖啡而已。

礦村豆腐花 $20
老婆對咖啡就唔太好，所以，揀咗食碗豆腐花，豆腐花喺微暖，亦有凍嘅，佢哋就無糖水，只有黃糖。大大碗豆腐花，份量無欺場，其實，跟出面食到嘅豆腐花唔會好大分別，基本上都做到好有豆香，亦做得好滑身，算得上喺有水準嘅出品。

鮮奶咖啡 $42
諗住佢哋定位為咖啡店，所以，對其咖啡有少少期望。小弟就例選鮮奶咖啡，原來個托盤刻有「鞍山探索館」嘅標誌，而且，杯身都喺，都幾有特色；至於咖啡方面，雖然睇得出都想拉個心形拉花，但精緻就欠奉，呷一口，啲豆應該唔差，因為飲落幾醇和，有果仁香氣，不過，沖泡嘅手勢就一般般，無攪過，入口口感夠未夠均勻，個人覺得撞奶泡時未夠深，打圈亦唔夠環闊。

店員補充，如果天氣好，仲安排一啲戶外嘅露天位，坐晌出面，既舒服，景觀更開揚，可睇到四圍嘅山景及小村落，感受寧舍唔同。唯可惜，啲雨落過唔停，昂平亦都上唔成，就連晌附近嘅240ML礦坑口都去唔到！有機會再訪昂平，一定順路過嚟坐吓。溫馨提示，佢哋只晌星期五、六、日（10:00am-5:00pm）開門咋！

個人評分
味道：7/10
環境：8/10
服務：8/10
抵食：8/10
平均每人消費：HK$42

餐廳資料：
礦工Café
地址：馬鞍山馬鞍山村上村35號恩青營鞍山探索館
電話：3421 1436 / 2350 9728