品樂冰室：有啲「樂」差

「品樂」開咗好一段日子架喇，但作為美孚街坊真喺未幫襯過，其實有諗過去食次早餐，不過有街坊老友話佢啲質素跟上手嘅西餐廳都差不多，咁佢嘅定價又唔喺話特別優惠，所以，就無乜誘因去試。最近同啲老友行完山，終點落返美孚，見客人唔多咁就不如入去試試下午茶，衰極都叫做成本低啲。

睇門面，一片主色調喺湖水藍，又加啲仿磚牆，諗住有啲文青感，但入到去，其實裏面裝修好簡約，基本上牆身都無話掛啲乜；由於本身個舖位唔大，加上做盡生意，啲枱自然拍得密密麻麻，亦喺之前疫情仲有番咁上下，而一直無幫襯嘅原因之一。

而餐具放晌枱側抽櫃，調味料就放晌枱面，基本茶記設定。

下午茶套餐，細細張餐牌，底面兩頁，都喺見慣見熟嘅款式，無咩驚喜嘢。我哋4個人，1個叫餐蛋治，3個叫菠蘿油，皆因見佢標示菠蘿油喺推介。

餐蛋治餐 $30
朋友嘅餐蛋治睇落做得唔錯喎，啲炒蛋望上去都幾厚身，佢就話炒得嫩滑，啲餐肉亦唔喺平價貨，連嘢飲收30蚊，算喺幾好架喇。

菠蘿油餐 $25
圖文不附就預咗，其實，我哋落單嘅時候都唔喺好多人，都唔知點解我哋3個嘅菠蘿油都烘到燶，個皮亦有少少乾同硬，呢個扣分比較多；至於片牛油唔算話好大片，亦唔叫厚，OK咁啦。

熱奶茶
嚟到茶記，熱奶茶都喺小弟自我嘅心水之選，呢度嘅奶茶飲落真喺唔差，你都見色澤沉實，入口有茶香，茶、奶嘅比例亦啱啱好，幾啱小弟嘅口味。

見個菠蘿油喺推介，可惜，揀咗錯，揀三文治仲好。另外，服務一環正如街坊老友所講，喺有少少亂，感覺啲店員好似仲未好熟啲流程咁，我哋落4杯飲品都會搞亂晒。

個人評分
味道：6/10
環境：6/10
服務：7/10
抵食：7/10
平均每人消費：HK$25

餐廳資料：
品樂冰室
地址：美孚蘭秀道6A-6B號美孚新邨第五期地下N20號舖
電話：2720 3099 / 9803 0900