再環顧一吓個餐廳環境，地方唔大，但裝修喺幾有大馬風情，尤其晌檳城好出名嘅壁畫，都晌度「重遇」番。不過，絕大部份櫈都無得挨，朋友就坐得唔喺太舒服。
餐具就簡簡單單插晌枱面嘅木「筷子筒」，有羹有筷子！櫈下有空間可以擺袋、擺雜物。
巨型大餐牌，個設計好有復古風，背面喺各式散點嘅菜式，包括肉骨茶系列、風味小食、地道小菜……等等。
此外，仲有一個餐牌，喺午市套餐嚟，共有9款選擇（$58-$78），包基本飲品，亦可加錢升級，以及加錢追加風味小食。
小食拼盤 $78 如果揀3份午餐，大家就覺得太多澱粉質嘢，所，嗌兩個午餐，再加一客小食拼盤，可以試到多啲嘢食。而拼盤包括有參巴辣雞串、咖喱豬皮魚蛋、酸辣鳳爪、炸春卷咖喱角、凍蕃茄秋葵，各以小碗、小碟盛載，都夠大堆頭。
參巴辣雞串 5款小食中，以辣雞串最有特色，亦喺最好食，參巴醬鹹香惹味，辣辣哋又唔嗆喉，啲雞肉又夠滑，好食。
咖喱豬皮魚蛋 咖喱嘢睇落幾靚仔，似模似樣，食落就唔喺有咩太大特別，味道、質感都OK嘅，喺幾辣吓啫。
酸辣鳳爪小弟就唔知馬拉有無呢樣小食，望上去都喺感覺泰式啲。都唔好理，好食就OK，啲鳳爪去晒骨，入口酸爽脆口，辣度啱啱好。
炸春卷咖喱角 好老實，呢樣真喺好港式，其實，佢哋散點嘅小食中不乏特色馬拉嘢，真唔知點解會擺呢兩樣嘢入拼盤中。味道呢？不過不失！
凍蕃茄秋葵 算喺簡簡單單嘅涼拌冷盤，只喺將冰鎮好嘅蕃茄同秋葵，加點醬油而已，食落冰涼清爽，除此之外，就唔太知食材本身有咩過人之處喇。
怡保芽菜雞飯 $68 怡保芽菜喺有特色嘅食材，外形肥嘟嘟，又較為短身，所以，就專登點呢一客雞飯，而飯品並配上油飯及雞湯，佐以薑蓉、辣醬、黑醬油。不過，啲芽菜睇落短身，但唔算好肥大，入口都爽脆嘅；啲雞肉好滑溜，皮下脂肪又少喎，最愛沾上薑蓉或黑醬油食；油飯唔算好夠油香，最大問題喺比較爛，反而個雞湯正，清香不濁。
老巴剎肉骨茶 $68 到訪新加坡或馬來西亞，都會品嚐一吓肉骨茶，過吓口癮。呢度嘅肉骨茶以瓦煲上，堆上大大件排骨，仲有豬腸同豆卜，配上白飯，佐以辣椒醬油、蒜蓉、油炸鬼，寧舍有風味。啲排骨肉質好鬆化，帶有葯材香，但唔會太嗆，豆卜索晒汁幾好食，但豬腸就真喺堅肥。搵啲黑醬油撈飯，其實都好好食架。
話梅桔仔冰 +$8餐飲就推薦加錢轉桔仔冰，一來有特色啦，二來外面熱到死，桔仔冰飲落就特別爽，桔味好酸香，仲加咗粒話梅，陣陣話梅嘅香味，兩者混埋一齊非常有化學反應。
周六嘅午市唔喺好滿，店員亦任我哋坐，無催埋單，但因為座位唔太舒服，所以，我哋食完都唔喺坐好耐就走。綜觀今日餐飯，小食拼盤就一般般，唔喺差嘅，但就無乜亮點，兩個主食就好壞參半，最好喺杯話梅桔仔冰，哈哈！
個人評分
味道：7/10
環境：6/10
服務：8/10
抵食：8/10
平均每人消費：HK$80
味道：7/10
環境：6/10
服務：8/10
抵食：8/10
平均每人消費：HK$80
餐廳資料：
霹靂南洋 Restoran Perak
旺角彌敦道575號Ladder Dundas5樓
6971 7738
霹靂南洋 Restoran Perak
旺角彌敦道575號Ladder Dundas5樓
6971 7738
沒有留言:
發佈留言