百樂門囍宴 Joy Cuisine：我的星期六美孚早餐 ~ 早茶有着「樂」

原來，好耐無約姨仔落嚟美孚飲早茶，睇番啲食評，原來亦好耐無嚟過呢一間「百樂門囍宴」飲茶，再者，「我的星期六美孚早餐」系列亦都喺好耐無寫過，無寫原因唔喺星期六無出街食早餐，只喺近排不外乎去開嗰幾間餐廳或快餐店，又真喺無乜好寫。所以，今次就寫番一篇早茶。

雖然呢間「百樂門」加上「囍宴」二字，定位都喺搞酒席，不過，樓底矮，柱位亦多，雖則裝修都做到富麗堂煌，不過，都喺予人一般嘅酒樓格局。再加上防疫措施，部份地方擺咗好多大隔板、大膠膜，感覺喺逼啲，幸而我哋3個人坐張四人枱，又晌正一個角落，感覺都會寬鬆啲。

一次過影晒幾張早市嘅點心紙俾大家參考，有唔少特價點心呀、孖寶呀……等等，選擇十分之多，茶價收$9位，另收加一服務費就梗加唔使講啦。

欖角排骨蒸腸粉 $20.8

平常大多數會叫吓鮮蝦腸、叉燒腸、煎腸粉，不過，今日就無叫，因為一來見到有呢一款蒸腸粉，唔喺間間酒樓都一定有，二來貪其欖角排骨夠惹味。欖角配排骨果然好味，不過，老婆就話排骨有啲肥，我嘅標準就叫OK啦，另外，啲蒸腸粉就唔喺好夠滑啫，但整體都算OK嘅。

金珠鹹水角 $25.8

老婆嘅欽點，因為喺姨仔至愛，一客有4個，比一般酒樓得3個為多，味道方面，鹹水角嘅外皮唔太厚，入口夠煙糯，而餡料調味得宜，最緊要又唔太油，絕對收貨啦。

客家鹹茶棵 $12.8

呢款喺最平嘅特價點心，一客有3件，仲要大大個，只賣$12.8，晌酒樓食點心嚟講真喺超抵。入口仲喺好夠熱辣，外皮軟熟有韌性，內裡有啲肉餡同菜脯，鹹香惹味又有少少爽脆感，好食喎。

醬皇蒸鳳爪 $29.8

跟住幾款點心都喺正價嘢，所以，散點價喺唔太划算，但就喺老婆同姨仔想食嘅點心。蒸鳳爪喺點心中嘅經典款式之一，又喺姨仔嘅心水。個醬汁調製得幾香濃，鳳爪蒸到腍透，墊底嘅花生亦好惹味。

柱侯金錢肚 $33.8

老婆雖然依家食嘢偏素，但人總有喜好，金錢肚就喺其喜好之一，再者，繼鳳爪，金錢肚又喺另一道經典點心。金錢肚軟腍帶點點爽口，非常入味，充滿柱候醬香，不過，份量真喺有啲少，下面仲例牌墊咗少少蘿蔔。

咖喱蒸土魷 $33.8

印象中，飲茶我哋都好少點呢一款點心，就算食車仔麵亦好少點呢款餸，真喺唔知點解，其實，我都幾鍾意呢款港式嘢食。啲土魷發得夠透，口感軟腍，而咖喱雖然喺港式嗰種，但都推得好香。

蜜汁叉燒包 $29.8

叉燒包又喺港式點心嘅另一經典，又喺唔多可以錯過嘅點心，更喺飲茶嘅一份情意結。講番個包，裡面嘅餡料好夠汁，味道又香濃，而叉燒咬落鬆化又惹味，至於包身，做得鬆軟唔黏牙，足見師傅嘅手勢穩定。

鳳爪排骨飯（早茶蒸點飯孖寶 $28.8）

喺人都想揀啲平靚正嘅點心，當中嘅早茶蒸點飯孖寶就見枱枱客人都點，蒸飯揀咗鳳爪排骨飯，雖然簡簡單單，份量都有碗幾飯，加上鳳爪、排骨嘅味道唔錯，飯粒蒸得又分明，都無怪乎咁多人都嗌嘅！

家鄉煎蘿蔔糕（早茶蒸點飯孖寶 $28.8）

老婆特別鍾意食蘿蔔糕、芋頭糕，所以，孖寶嘅點心就要咗家鄉煎蘿蔔糕，老實講，碟蘿蔔糕就無乜驚喜，叫做穩打穩紮，煎得香口，口感挺實唔削身，蘿蔔味十足，更有少少臘味混在其中。

今餐早茶越嗌越多嘢，嘆咗個半鐘有多，直情唔止喺早餐，當埋晏晝嗰餐都有餘。食到飽飽，就再行轉短山上馬騮山幫助消化。

個人評分
味道：7/10
環境：7/10
服務：7/10
抵食：8/10
平均每人消費：HK$90

餐廳資料：
百樂門囍宴 Joy Cuisine
美孚美孚新邨第七期萬事達廣場一樓
2741 1222