富興潮州粉麵：絕不「興」盈

今日約好同朋友踩單車，由大埔出發，北上經粉嶺、上水再沿新單車徑打橫過踩到去元朗，其實舊年10月都踩過一次，不過，當時踩到去元朗就回程返大埔，今次就唔同，踩單程，到咗元朗會再繼續，目的地喺屯門，然後坐返屯馬線走。上到去到元朗外圍嘅「南山軒」食晏，今次就入咗元朗市中心「富興」食粉麵，喺友人介紹，要試試一款大雜會式嘅粉麵，喺絕不輕盈之選。

時值午飯時間，所以，鋪內都幾多人，加上室內環境唔大，枱櫈間隔又有啲逼，故此，喺有啲擠壓感，不過，嚟得港式粉麵鋪，環境都喺咁上下，依家疫情緩和都無乜所謂，我哋好彩趁有人埋單，搵到個埋牆位，感覺好少少。

枱邊插住餐牌，大大版底面兩頁，選擇非常之多，唔止有粉麵，仲有飯類、泡飯、淨食、單點、飲品，定價都大眾化，可以以優惠配飲品。我哋各自嗌，快上快落，費事阻人做生意，所以，今次就只寫自己食過嘅嘢，

富興八味寶麵 $58

踩咗幾個鐘頭車，下午仲有一段路，所以，豪少少揀碗八味寶麵，啱晒心多多嘅人，餐牌就列明有魚蛋、片頭、魚片、扎肉、肉丸、牛丸、墨丸、紫菜、魚皮（應該喺指魚皮餃），查實仲有雲吞，直頭喺十寶啦。湯頭算清甜，而各種食物嘅食味都唔錯，唔會話好有驚喜，但亦唔差，起碼魚蛋、魚片確喺爽彈，牛丸有肉香，雲吞嘅蝦味夠鮮……，只喺魚皮餃有啲過鹹。

凍檸檬茶 +$8
熱飲加$7，凍飲加$8，踩單車踩到一身汗，當然搵杯凍飲降降溫，杯凍檸檬茶嘅茶味夠濃，檸檬都俾到有4片，入口好港式檸茶風味，最緊要都喺夠凍啫，爽呀！未食麵，都飲咗半杯喇。

食完碗麵，飲咗杯凍飲，又攤抖咗一陣，啲力氣返晒嚟，下午繼續上路，向屯門進發，而前段已踩咗2/3，所以，之後呢段會輕鬆少少，唯此段單車徑較為斷截節禾蟲咁，唔喺咁好踩。

個人評分
味道：7/10
環境：6/10
服務：8/10
抵食：8/10
平均每人消費：HK$66

餐廳資料：
富興潮州粉麵
元朗又新街33號怡豐大廈地下9號舖
2788 1698