意大利餐廳 Resto Bar & Grill：「意」外之鹹

年初，跟姨仔由流水響水塘，再經鶴藪水塘、沙螺洞、鳳園，去到太和，今次就由小弟帶路，由元朗大棠，經黃泥墩水塘、大欖水塘（順便睇埋千島湖）、掃管笏，最後終點喺到黃金海岸食晏。可能假日關係，黃金海岸商場呢度超多人，有幾家心水餐廳都爆晒棚或者坐得好密（單睇相已為疫情已過添），最後揀咗呢一家意大利餐廳「Resto」，點解相對少人？因為比其他餐廳都貴一截囉！

是日天氣都好好，夠陽光，又和暖，所以，有唔少人揀坐出嚟戶外位。

而室內環境裝修得甚富歐陸風情，加上高樓底，空間感十足，用上皮梳化椅，亦幾舒服好坐。

平日就有啲午餐供應，但周末、周日就只有散點，所以，相對地，比起其他有午餐供應嘅餐廳，佢哋嘅價位就自然高一截。睇番啲種類，有湯品、前菜、沙律、薄餅卷、意大利麵、意大利飯、肉類或海鮮主菜、薄餅、漢堡、三文治及甜品，以及專為小朋友而設嘅小童餐。

Mango Milk Shakes $50、Fruit Punch $50

杯雜果實治有啲似杯凍檸檬茶，唔喺我嗌，亦無問好唔好飲，所以，評論唔到。而小弟就要咗杯芒果奶昔，睇落就幾啲辦喇，飲落芒果味好濃郁，口感亦好香滑，算得上唔錯，尤其啱啱行完山，感覺就更加爽。

意大利辣肉腸薄餅 $130

喺較有意式風味，又簡單嘅款式，熱烘烘咁送到嚟，面頭鋪滿辣肉腸及灑滿莫沙里拉芝士，外觀份外吸引。餅底屬厚批，批邊有脆位，中間就好軟熟，雖然只喺落茄醬同芝士，但都已經好好味，加埋辣肉腸嘅鹹香，當然變得更惹味，整體上可以講喺有水準。

香蒜蜆肉炒扁意粉 $135

呢一款可以講喺意大利麵中常見嘅款式，亦心想喺較穩陣。先試試啲蜆肉，都幾鮮味，又有少少海水嘅鹹鮮味，就算唔喺新鮮貨，都唔會喺雪到死嘅平嘢；再試試啲扁意粉，煮得夠咬口，有韌勁，質感就好對辦，亦充滿蒜香；不過，食一口無乜嘢，食多兩口就覺得偏鹹，我哋幾個人共享都叫勉強OK，一個人食晒一碟嘅話就難講。

酥脆豬手 $170

原打算叫醬烤豬仔骨，但竟然午市已經話無貨，改而點咗一客豬手。隻豬手都頗大隻，亦切成小件，並配上薯角及紫椰菜（並非傳統德國鹹豬手所配嘅酸菜），不過，餐牌寫明配蜜糖芥末醬就唔見有，只喺有一小兜茄汁用嚟點薯角，此外，明顯炸得過火，有啲燶。還好嘅喺，食落皮脆，啲肉又唔喺好乾、好嚡，質感都OK啦，但就肯定過鹹。事後有跟侍應反映，佢話個廚經常都重手咗，加上有兩道菜都喺咁，所以，我都相信個廚喺根本問題，而唔喺個別例子。

環境雖然喺好，招呼還OK，但人手有啲唔夠，不時舉手都無人理，但店員態度喺有禮嘅。食物質素就有些微根本性嘅問題，三道菜中有兩道過鹹，加上收費亦唔喺話特別平，正常嘅中檔餐廳價錢，故對食物嘅質素喺有所期望，翻兜嘅機會絕對喺零，始終，呢個商場都仲有好多選擇。

個人評分
味道：5/10
環境：8/10
服務：6/10
抵食：6/10
平均每人消費：HK$200

餐廳資料：
意大利餐廳 Resto Bar & Grill
屯門屯門黃金海岸商場地下3-5號舖
2628 1117