走進室內，其實餐廳唔喺好大，以白色為主調，襯以淺灰，顯出一派典雅感。全場都喺矮身梳化椅，舒適好坐。
如果一個人嚟，最好就喺窗口位啦，雖然對出喺街景咋，但因為唔會人多車多，而且，每枱都以乾花作點綴，感覺好唔錯。
成日講麩質、生酮，究竟喺乜，唔好人講你又講，食完都唔知喺乜，餐牌中就有一頁詳情介紹咗，自己睇睇當長吓知識。
雖然，預早就只打算食件蛋糕，飲杯咖啡，但都介紹吓整體嘅餐牌。先講講飲品方面，除咗固有嘅基本飲品外，仲有唔少限定嘅特色之作，不過，小弟屬傳統，襯甜品，都喺鍾情鮮奶咖啡。
食物嘅選項又點呢？同樣有好多選擇，先介紹主餐牌，有早餐碗、湯品、沙律、小食、特色多士、奄列、牛油果特色菜……等等，當然，就仲有甜品啦。
除餐牌中嘅甜品，水吧旁嘅凍櫃仲放有好多蛋糕，不過，唔好以櫃內嘅蛋糕款式為準，反而，喺櫃上面啲食物名牌先至真，代表有無邊一款蛋糕。
此外，仲有一個午市餐牌，共6款選擇，但唔喺套餐嚟，飲品需另外加錢配。整體而言，基於純素、生酮，所用嘅食材都會比一般嘅高，所以，食物嘅定價相對偏高。另一方面，無咩下午茶套餐之類，亦無咩配搭飲品優惠，樣樣都要散點，所以，計起價嚟就咁一杯咖啡、一件餅都要成嚿水多啲！
除咗環境甚似歐陸小館之外，連餐紙都好別緻，比起簡單一張白餐紙，呢張跟餐牌嘅藍底配花花圖案喺咪一脈相承呢！
Caffe Latte $38 佢哋嘅蛋糕定價都偏貴，反而，咖啡嘅定價相對相宜好多。襯甜品，小弟都喺鍾情帶奶成份重啲嘅鮮奶咖啡，基於喺生酮、純素飲食，所以，咖啡都會用一啲杏仁奶、燕麥奶、無糖份嘅豆奶嚟取代牛奶。燕麥奶之前都試過好幾次，用嚟做拉花效果一樣唔差，睇我呢杯，個拉花拉得線紋細緻，左右都算對稱，面面亦無起泡泡；入口口感好均勻，完全唔使攪，唔使落糖，已飲得出嗰份醇香細膩。
Blue Earl Grey Cake $72 全店嘅蛋糕都喺無麩質，絕對唔怕會有敏感問題，而呢一款帶憂鬱藍調嘅伯爵茶蛋糕算喺鎮店之作，灰藍色嘅「忌廉」之上，再灑咗少少食用花作點綴，賣相甚具少女風。
面層嘅「忌廉」及中層嘅「慕絲」都喺以椰子奶製作，而海綿蛋糕則用上糙米粉去做，有別平常嘅麵粉，老實講，質感又真喺分別唔大。混入蝶豆花元素做成灰藍嘅忌廉，雖然味道唔會有咩特別，但口感輕柔軟滑；而下面嘅伯爵茶蛋糕好鬆軟綿綿，中層嘅伯爵茶慕絲亦好幼滑細緻，兩者嘅茶味都好濃郁而突出。
近年主打素食、健康嘅食店已經開到成行成市，而主打無麩質、生酮飲食都似乎仲喺起步階段，始終唔同人有唔同需要，相信假以時日，都會有更多呢一類餐廳。
個人評分
味道：8/10
環境：8/10
服務：8/10
抵食：6/10
平均每人消費：HK$110
味道：8/10
環境：8/10
服務：8/10
抵食：6/10
平均每人消費：HK$110
餐廳資料：
Infiniti C
西環堅尼地城科士街40號浚峯地下6號舖
3460 4996
Infiniti C
西環堅尼地城科士街40號浚峯地下6號舖
3460 4996
沒有留言:
發佈留言