餐廳位處新商廈「海濱匯」一樓，正正喺觀塘海濱走廊嘅一頭，食完就剛好由呢度起步。餐廳呈長形，環境採半開放式，所以，由外面已看到餐廳嘅整體環境，擺設咗非常多植物，佈置到猶如一個小花園，加上一邊喺落地玻璃窗，透盡清爽嘅陽光，樓底高，空間感十足。
為咗避人潮，我哋專登過咗2:00pm午市高峰位先嚟，剛好客人唔算太多，有機會獨佔「溫室小屋」，既自成一角，又放咗啲咕，感覺特別好坐。
除咗用餐區，其實餐廳可以講劃分咗兩部份，另一部份就喺晌前頭嘅「Cafe」區，既做咖啡嘅外賣生意，客路自不然喺樓上嘅寫字樓客；亦放置咗啲高腳枱櫈，俾純粹嚟飲吓嘢嘅客人坐吓、攤抖吓。
講講有啲咩食先，有兩個小餐牌，一個喺食物，另一個喺飲品，最欣賞喺版面用上水彩彩繪嘅食物照，多添幾分藝術味。
食物餐牌，第一版喺店家推介嘅新品定食，跟住有啲輕食、麵包、三文治、是日意粉、飯品定食、甜點……等等。凡點食物，飲品都有半價優惠。
而飲品呢，第一版似喺啲新推特飲，跟住就仲有各式咖啡、各式冷熱茶品、特飲……等等，都有幾多選擇。餐牌還以中、英、日文製作，好認真。
未講到食，順便講講啲細節位，枱上放咗啲紙袋喺俾客人袋起啲口罩，另外，餐具放晌可冚實嘅木盒內，比較乾淨衛生。
香煎芝麻吞拿魚牛油果丼 $148 見到喺牛油果，老婆已經揀定佢，加上喺配魚，偏素嘅佢就更合其喜好。而呢個喺定食丼嚟，仲會配埋味噌湯及前菜，以小木盆盛載，甚具和風。
味噌湯睇起嚟就唔覺得有咩特別，但老婆一飲落，就話除麵豉香，仲有濃濃嘅鰹魚味，夠真材實料。
而前菜喺芥末鱆魚粒，作為前菜，又幾清爽，啲鱆魚粒煙煙韌韌好有咬口，帶微微嘅日式芥末味，但唔會辣到好攻鼻嗰種，幾唔錯。
講到碗丼，份量好十足，除咗鋪滿吞拿魚之外，牛油果蓉又一大抹，並灑下唔少紫菜碎，仲有加咗一大撮新鮮明太子，為有畫龍點睛之效。吞拿魚取「赤身」部位，加上煎一煎過，並沾滿芝麻，可謂極得老婆歡心，食到魚生嘅柔嫩感，但又唔會太生，又唔會如「拖羅」太油，再者，芝麻嘅香味令件「赤身」嘅味道更具層次。碗內嘅珍珠米煮得軟綿黏糯，小弟就試過以牛油果蓉、明太子、少少紫菜碎配飯一口過，喂！好食喎，集鮮、鹹、香於一身，味道及口感都多元化。
藏紅花大蝦意大利扁麵 $128 另一個主食就揀咗是日意大剩粉，因為聽到今日喺藏紅花（有啲人會稱之為蕃紅花）配大蝦，少紅肉嘅又啱到我老婆食。同樣喺一份定食嚟，有沙律及一件小甜點。
沙律只喺帶和風嘅田園沙律，但沙律菜好新鮮，鮮甜爽脆，配下柚子醋，味道清爽。
個意大利扁麵，唔止有大大隻嘅鮮蝦，仲灑滿櫻花蝦，故此，食起嚟個麵會多咗層脆卜卜嘅口感，而實際上個麵又煮到啱啱好，麵條咬落有韌勁。啲大蝦食得出喺新鮮貨，既有鮮蝦味，又有爽彈嘅口感，去晒殼又方便食用。個藏紅花忌廉汁又校得好，記得藏紅花本身有食大療功效，但唔可以落得多。
小甜點喺芝麻麻糬，粒麻糬外層沾得滿滿芝麻，所以，入口充滿芝麻香，而內裡口感軟糯，餡心包住嘅喺清甜紅豆蓉，簡單味美。
熱情果冰搖茶 $17 講笑咁講，老婆話杯冰搖茶有啲似啤酒，哈哈，咁就要飲勝喇。杯冰搖茶飲落好清爽，紅茶底幾香，熱情果味突出，卻唔會太酸，而且，少甜就更健康 。不過，如此有得揀少冰就更具彈性。
拿鐵 $19 小弟就揀咗杯慣性享用嘅拿鐵，加上額外點了一客蛋糕，就更要搵杯意式咖啡嚟配襯。拿鐵嘅拉花已經喺好賞心悅目，花紋複雜而細緻，確實唔易拉。唔使搞，唔使落糖之下，已飲得到口感均勻，醇香嘅咖啡中又帶出微微果仁香味，非常有水準。
日向夏柑橘蛋糕 $48 是日有3款蛋糕供應，包搭括北海道朱古力蛋糕、日向下柑橘蛋糕及梳乎厘芝士蛋糕，一聽到「日向夏」二話不說就揀佢，因為喺晌九州宮崎嘅獨有品種，2017年就到訪過。整份甜點嘅賣相都頗有心思，睇落亦好清爽，而蛋糕入口柑橘味十分清新，上層嘅慕絲好柔滑細膩，下層嘅海綿蛋糕就好軟熟。
兩公婆周末拍吓拖，食餐好嘅，之後行吓海濱長廊，何其寫意。整體而言，「Break」嘅環境、招呼都好唔錯，而賣點以日本食材入饌，本身已喺一重保證，加上師傅做菜睇得出花心思，所以，喺一家值得推介嘅餐廳。
個人評分
味道：9/10
環境：8/10
服務：8/10
抵食：8/10
平均每人消費：HK$200
味道：9/10
環境：8/10
服務：8/10
抵食：8/10
平均每人消費：HK$200
餐廳資料：
break
觀塘海濱道77號海濱匯1樓13-14號舖
2886 0667
break
觀塘海濱道77號海濱匯1樓13-14號舖
2886 0667
沒有留言:
發佈留言