東叔叔雞蛋仔：最緊要新鮮

前文提要吓，同老婆晌牛頭角嘅「break」食完晏，再沿觀塘海濱走廊漫步，過到嚟觀塘，再逛逛廠廈買吓嘢。經過「駱駝漆大廈」呢邊，晌閘門口角落見到間小店賣雞蛋仔，堆滿人幫襯，又聞到陣陣雞蛋仔香氣，過吓口癮就買咗包「止癮」。

小店主力賣雞蛋仔及格仔餅，而前者仲分咗正常雞形及特別少少嘅心形，不過，就唔會搞咩花巧喇提供唔同味道，向「傳統」致敬！？

晌等候期間，先留意到原來小店喺大賣香港情懷嘅街頭小食，除雞蛋仔、格仔餅外，仲有爆谷、龍鬚糖、叮叮糖、麥芽糖夾餅、飛機欖、糖蔥餅……等等。不過，好搞笑，我仲見到有啲炸魚皮，生意難做，當然，賣多一兩款產品嚟增加生意額喺常態。

原味心形雞蛋仔 $20

咩都喺即整即食就最好架啦，雞蛋仔吸引之處就喺即做，睇住佢由蛋漿烘焙成雞蛋仔。問吓整緊雞蛋仔嘅哥仔，點解唔加啲唔同口味呀，佢解釋呢度喺賣懷舊嘅，做法忠於傳統，不搞新花款、新口味，謹守食出原味嘅蛋香及口感。不跟風，果然夠專一！

等三數分鐘，就「新鮮」出爐，唔少得一個步驟喺等佢攤一攤，散散熱，咁樣外層先會更脆口。

雞蛋仔烘得金黃，揀心形就純粹氹吓老婆，啲邊位脆到好似薯片咁，而「蛋殼」帶微脆，「蛋心」餡料有2/3滿，睇得到好綿密，絕無欺場，入口卻非常軟綿綿，攤咗陣都仲喺熱辣辣，又極具蛋香，就算只喺原味，食味都唔失禮，都有其值得欣賞嘅地方。

唔知有幾多年輕一代食過呢啲懷舊小食，我諗除雞蛋仔及格仔餅較普遍之外，其他嗰幾樣已經好少地方有賣。想懷舊吓，集體回憶吓，過開嚟觀塘就搵搵「東叔叔」，並支持一吓小店。

個人評分
味道：8/10
環境：5/10
服務：7/10
抵食：8/10
平均每人消費：HK$20

餐廳資料：

東叔叔雞蛋仔
觀塘開源道60號駱駝漆大廈3座地下A3號舖