山區裡的走走趯趯: Hunger Point：「墨」有所值

2021年2月10日星期三

Hunger Point：「墨」有所值

墨西哥嘢小弟都鍾意食，因為都幾夠特色，不過，就好少刻意去搵。晌上環返工嘅老友告之，晌歌賦街近尾新開咗間小店，主打墨西哥美食，都喺開咗兩個月左右，叫我有興趣嘅話可以去試試。所以，今次專誠走訪一下。

咪睇佢門口細細，其實，個鋪位都幾深，而且，樓底超高，加上只有面壁嘅單行高腳位，所以，完全無焗促感。

近門口嘅一排位，牆上裝有好多水管及電燈泡，有種走工業風嘅味道。而對住嘅另一邊，卻掛咗好多張黑膠碟，睇怕喺店主嘅珍藏。

再走入少少，就晌樓梯底嘅一角，擺放咗一隻道具大衣夾同一啲公仔，反映店家俏皮嘅一面，呢個亦喺好多人嘅打卡位嚟。

最入面仲有一排位，風格有啲唔同，較光潔明亮，而且，牆上則貼滿唔少餐廳嘅食物照。此外，我幾鍾意佢哋啲防疫大膠板，厚身夠大塊，又可移動，如果自己一個嚟都可以間成一人位，自己縮埋一角。

上文都講過餐廳喺賣墨西哥嘢，主力就喺墨西哥薄餅（Taco），可以揀脆嘅或軟嘅，定價$46一件，但同時間買2件或3件就會再平啲。此外，仲有將墨西哥嘅特色食材配以飯或沙律做成嘅Rice Bowl或Salad Bowl，定價$78/$88。另外，亦提供少少甜點選擇，就喺有港式元素嘅雞蛋仔，以及低脂軟雪糕。

無論點Taco，還是Taco Rice (or Salad) Bowl，都可以以優惠價$8 / $25加配非酒精飲品或酒精飲品。咪睇張單張有咩嘢飲揀，因為實際唔止咁少，行埋去凍櫃睇睇，就見到有更多選擇。

落單後就搵個位坐坐，之後會由店員送上嚟。此時，你就會發現店家提供超多款唔同味道嘅辣醬俾客人自由取用，一齊排排晌枱面，都有少少壯觀架。

Red Bird – Taco Rice Bowl $78

我幾鍾意佢哋每款菜式都印晒啲食材出嚟，清清楚楚，免得點咗啲唔啱食嘅嘢。呢款「紅鳥」就有墨西哥辣雞、生菜絲、牛油果醬、烤粟米蕃茄、芝士、酸忌廉同玉米片，嘩！唔喺講笑，啲料堆滿成個碗面，而且，搵啲飲品對比吓，你就個個碗有幾大，真喺飯量、餸量都十足，絕無欺場。先喺玉米片沾啲酸忌廉，當喺餐前小食，之後可以一啖飯、一啖餸，再唔喺就撈勻嚟食。啲雞肉都堅辣，但就好惹味，拌勻埋啲牛油果醬、烤粟米蕃茄、芝士、酸忌廉，味道豐富又有層次。

No Meat Today – Taco Rice Bowl $78

呢一款就擺到明喺素食啦，食材包括有天多利玉子豆腐、堅果、羽衣甘藍、日本車厘茄、烤粟米車厘茄、野菌、羊奶芝士、牛油果醬同枝豆，陣容鼎盛呀！一向素食予人感覺都喺單調、清淡，但呢個絕對唔會囉，尤其以印式嘅天多利處理啲玉子豆腐，又加入羊奶芝士，自然味道多變；再者加上果仁碎碎、烤粟米粒、枝豆……等等，口感豐富，而啲白飯又好軟熟，喺甚有亮點嘅一個素食飯品。