「南小館」無得訂枱，所以，細佬妹提早到場撳飛攞位，不過，就算星期六晚飯市高峰時段，由於疫情持續，都未有爆場。咪睇門口好似好多人，其實，不少喺等外賣。之但喺，目測都有八乘幾滿，而餐廳裝修簡約，一室以白色為主調。
點菜紙亦喺等於餐牌，有咩選擇就晌晒點菜紙度，大致叫分為10類，小弟就唔嘥時間抄多次出嚟，掃描張點菜紙俾大家參考吓。點菜紙都有寫明，茶水就$6位，餐前小碟$9碟（1-4人），當然要收埋加一啦。
餐前小碟 $9 晌大家仲研究緊想食咩之時，就邊食啲小食邊諗，小食喺鹹脆花生同香辣菜脯，前者鹹香清脆，後者就爽脆惹味。
南小館四小拼 $80 冷盤小食有成十多款，嗌四小拼就最划算，晌指定7款冷盤中揀4款，樣樣少少，可以一次過試到多少少嘢。有部份已經無貨，最終我哋揀咗四喜烤麩、秋葵木耳、糖醋排骨及花彫白雞，睇落份量唔少喎。烤麩喺個人最鍾意食，軟腍有種麥香，木耳就爽爽脆脆，排骨就鬆化香濃，醉雞則清爽有酒香，肉質非常嫩滑。
鮮肉小籠包 $45 一客有5個，外觀望落啲皮就唔喺好薄，摺位亦喺好厚吓，咬落外皮確喺有啲厚，令到口感差咗少少；還好喺啲肉餡鬆化，夠多肉汁，整體叫做還可以。
蘿蔔絲酥餅 $42 蘿蔔絲酥餅最緊要喺即叫即做，入口熱辣辣先好食。外觀就幾對辦，入口層外皮都頗酥香鬆化，亦唔會有油膩感，裡面填滿蘿蔔絲，絲絲清甜，幾好食。
金網生煎窩貼 $45 本來想點生煎包，但已經話賣晒，退二求其次，就要咗一客窩貼。鍋貼煎得個底焦香脆口，餃皮有咬口，餡肉鮮味爆汁，有水汁喎。
炸銀絲卷 $26 都好耐無食過炸銀絲卷喇，啲銀絲卷炸得金黃，一咬皮脆甘香，內裡好軟綿綿，沾少少煉奶，都已經好唔錯。
醬爆腰果雞丁 $78 賣相平實，濃油赤醬個皮，亦喺一貫上海菜風格。啲雞丁都嫩滑，濃香惹味，伴飯就最一流，不過，啲腰果唔脆喎，大大扣分！
米湯時蔬 $52 本來喺想叫腐皮小菠菜，點知又無，改嗌呢碟米湯時蔬，時蔬喺啲菜苗，都幾嫩口，而底下喺啲米湯，清清哋夠健康，又平衡番啲肉類菜式。
家常炒麵 $68 比起點菜紙，啲炒麵出奇地好紅吓，唔知加入咩元素，會唔會喺紅菜頭汁呢？總之，食落唔會有咩特別嘅味道，雖然「整色整水」，但只喺加啲肉絲、菇菌炒埋一碟，都仲喺好「家常」。
細沙南瓜糰 $30 樣子做得的骰又像真，夠晒可愛，南瓜糰外皮軟綿煙糯，卻又唔黏牙，淡淡南瓜味，襯晒內裡清甜啲紅豆沙餡。
桂花蜜拉糕 $30 拉糕做得精緻可人，仲唔手緊倒咗唔少桂花蜜糖，所以，入口桂花嘅香氣好突出，帶點甜蜜滋潤，齒頰留香，而拉糕本身口感煙韌，同樣喺唔黏牙，好食。
今晚所點嘅食物質素有高有低，但整體嘅評價屬中中等等咁啦，不過，人手明顯就有啲不足，見成場得3個侍應，其實，見佢哋都好落力招呼，亦好有禮貌，但唔夠人手就喺唔夠，唯有耐心等待吓。
個人評分
味道：7/10
環境：7/10
服務：7/10
抵食：7/10
平均每人消費：HK$145
味道：7/10
環境：7/10
服務：7/10
抵食：7/10
平均每人消費：HK$145
餐廳資料：
南小館 The Dining Room
青衣青敬路33號青衣城2期2樓225號舖
2651 8899
南小館 The Dining Room
青衣青敬路33號青衣城2期2樓225號舖
2651 8899
沒有留言:
發佈留言