太平洋咖啡 Pacific Coffee Company：我的星期六美孚早餐 ~ 聖誕新品

好耐無寫過「我的美孚星期六早餐」系列，雖然近乎個個星期六都專登出街食早餐，早前兩公婆輪流小病，多數落「海皇」，否則就比較多去McCafe多，間唔時幫襯吓同區美字頭、大字頭嘅快餐店。今次，就唔同啲，打算入廸士尼玩，補祝老婆生日，所以，就一早輕鬆去「Pacific Coffee」嘆咖啡食早餐，培養吓遊樂嘅情緒。

嚟得呢類咖啡店，就梗唔喺匆匆食個早餐就閃，所以，環境頗重要，個人就幾鍾意依間PC，因為地方夠大，環境闊落，無論揀梳化椅，抑或木椅位，都感覺舒適。對比起萬事達廣場嘅「Starbucks」，環境確喺佔優。

一向喺鮮奶咖啡嘅粉絲，但走到櫃枱睇睇有咩好食時，見有啲應節嘅聖誕新品咖啡推出，反正價錢跟其他飲品都喺差唔多，當然貪新鮮試一試啦！剛好新品有3款，其中1款凍飲無供應，剩低嗰兩款熱飲就唔使多諗揀邊樣。

順便望埋食物櫃，由於一早關係，選擇齊全，不過，以早餐而言，都喺揀番熱批窩心啲。

咖喱素菜批 $28

咖啡喺老婆喜愛嘅味道，素菜就更加啱佢，本應都對個素菜批有期待，不過，佢話個咖喱味未夠突出，而小弟就嫌個批殼厚身咗啲，亦都唔夠脆口。

洋蔥煙肉蛋批 $28

我就揀蛋批，香啲嘛，反而個蛋批做得幾好喎，批殼唔算過厚，脆口之餘，批內填滿洋蔥、煙肉及芝士，香濃惹味，又有蛋香，暖呼呼，配咖啡真喺稱心。

岩鹽紅桑莓松露朱古力 $42

老婆唔太鍾意咁多忌廉，所以，全走；咪睇見「松露」就以為喺有黑松露喔，哈哈！有食開朱古力嘅朋友都知有一種柔滑嘅朱古力款式叫「松露朱古力」，所以，呢杯熱飲喺以依種朱古力開沖，故此朱古力濃香而幼滑，而且，加入岩鹽（事後先知喺喜馬拉雅山岩鹽）、紅桑莓糖粒，令味道層次豐富，但有一點奇怪，雖加入岩鹽，老婆都仲喺覺得偏甜。

紅桑莓松露朱古力牛奶咖啡 $42

朱古力牛奶咖啡（Mocha）我都啱嘅，跟老婆嗰杯其實差唔多，只喺多咗咖啡元素，此外，我呢啲瘦底梗喺唔怕忌廉啦。用上鮮紅色嘅瓦杯，感覺就更加有節日氣氛。先從邊位飲一啖朱古力牛奶咖啡，朱古力跟咖啡味都幾平衡，再將忌廉攪勻，口感更柔滑，而慢慢滲出紅桑莓嘅酸甜味，整體感覺真喺幾好喎。

因為「曼克頓山」呢個樓盤前身喺九巴車廠，所以，依間PC都刻意掛咗啲懷舊九巴嘅相片，小弟唔喺巴士迷，但對部份舊式巴士都載有一份回憶，想起盛夏之時嗰啲「熱九」真喺幾難頂。

一件蛋批，一杯咖啡，輕鬆嘅一頓早餐，雖然，老婆話食味未臻完美，但心情絕對良好。

個人評分
味道：7/10
環境：8/10
服務：8/10
抵食：7/10
平均每人消費：HK$70

餐廳資料：
太平洋咖啡 Pacific Coffee Company
荔枝角寶輪街1號曼克頓山地下04-05號舖
2907 1234