事隔多年無嚟，印象上，餐廳嘅環境無變，就算食物區嘅分佈都喺一樣，一字長形，頭尾喺用餐區，食物大部份集中晌中間位置，而最搶眼喺餐廳內幾幅大壁畫，色彩繽紛，頗有法國農場果園嘅感覺。原來餐廳正做緊主題「奇幻彩苺園」嘅自助餐，更以唔同嘅莓類入饌。
不過， 就加插咗唔少「可口可樂」嘅經典藏品，亦有多張海報，原來喺同「可口可樂」嘅短期合作。經典嘅汽水樽可不少，但1公升嘅「大樽」晌當年嚟講真喺好特別。此外，四周佈置上，還有食物，都添加咗聖誕元素，不過，個人感覺聖誕氣氛未夠濃烈，播番少少聖誕歌做背景音樂，氣氛會強番啲。
枱上嘅紙枱墊，小弟亦幾鍾意，除咗啲彩繪畫得好靚之外，啲插圖都喺西環嘅著名景點或地道嘅本土美食，份外親切。
依家惠顧自助晚餐，每位客人更奉送一杯餐酒，其實，餐酒唔算好鍾意，不過，免費嘅就梗喺要啦。一陣實會食海鮮盤，所以，揀要白酒，評酒唔喺小弟專長，就無謂多講獻醜。
啲可樂唔止得個睇字，仲梗喺有得飲啦，成大座士多懷舊式汽水櫃，大多數後生仔可能未見過，我等依啲70後就極有童年回憶。想當年，一有「星戰」上畫，就去捕士多執「蓋掩」儲印花換禮物。白酒伴海鮮，可樂伴熱盤、烤肉就襯晒啦。
沙律、海鮮、冷盤
一上樓梯到餐廳，就會見到甜品，而甜品後面就喺沙律、海鮮、冷盤區，因為一向都先食沙律嚟幫助開開胃，所以，就先介紹呢組食物區。陣容普通，一大盆雜沙律菜、7款配料、3款醬汁，醬汁亦喺大路嘢，凱撒、千島、意大利油醋，不過，靈光一閃，最吸引我眼球喺有兜雜莓水牛芝士，當然唔可以錯過啦。
回本位嘅凍海鮮方面，比預期好喎，雖然無生蠔，但有龍蝦、麵包蟹、長蟹腳、甜蝦、青口、大蜆、翡翠螺，樣樣要啲都砌出成份海鮮拼盤啦。
冷盤，普通嘅有啲煙三文、鮫魚同凍切腸，高檔少少嘅就有莎樂美腸同巴馬火腿伴蜜瓜。
沙律拼冷盤
兩大類食品拼出一大碟，睇樣唔失禮架，啲沙律菜又幾爽脆，雖然醬汁唔特別，但本身味道都唔差；巴馬火腿鹹香，卻喺未夠油潤啫，而啲煙肉碎煎得較硬。
海鮮拼盤
唔蝕底就當然每款海鮮都執啲，基本上佢哋有咩凍海鮮都有拎，折實四嚿水有咁嘅海鮮供應，算唔差。食過之後，質素比預期中好，啲龍蝦肉爽多膏，麵包蟹鉗啲肉好鮮甜富蟹味，大蜆亦算好肉地，翡翠螺入口柔韌爽口。
走到去開放式廚房區， 見一大籃新鮮海鮮，以為又有海鮮拆，原來唔喺，喺即煮法國「馬賽魚湯」，呢個位真喺有啲喜出望外。因為以往見好多自助餐都升級以燉湯作為中式代表，而西餐不外乎喺忌廉或雜菜湯，但估唔到依度嘅西湯喺即煮菜式，可知咗搞法幾嘥師傅時間，咁有誠意就必定捧場。
馬賽魚湯
有得你睇，真喺即點即做，睇師傅仔炒熟啲料頭、海鮮（籃內龍蝦喺裝飾），再倒入鮮魚湯，味道飲落真喺好唔一樣，鮮香突出，同埋海鮮料無手緊，有大海蝦、魷魚、青口、大蜆及魚柳，喺唔可以錯過嘅美食。
飲西湯嘅最佳拍檔就喺麵包，所以，順帶介紹埋麵包籃同佢哋嘅芝士拼盤。前者有幾款歐陸式麵包，最好喺有個自動式焗爐機，烘番嘅麵包幾時都喺好食啲；後者則有3款芝士，伴有克力架同啲乾果，淨食還是配麵包都喺唔錯。
跟住就詳細介紹吓開放式廚房仲有啲咩菜式，一頭就喺刺身、壽司，一尾有啲燉湯，中間排列多款熱盤，憑相記憶，計有燒西冷牛扒、蜜糖燒甜薯及南瓜配松子仁、煙肉炒椰菜仔、焦糖粟子、清炒時蔬、斑片、紅加倫子青檸黃莓蝦球、糯米飯、豬腳薑（仲記得多年前嚟都有呢樣嘢，個老細對豬腳薑都幾情有獨鍾）、豬腩肉、蕃茄焗三文魚、意大利菠菜雲吞、燒豬肋骨、紅酒燴牛尾，補貨足，但無轉過款式。
刺身、壽司卷
有6款刺身晌自助餐嚟講都唔算少，但壽司無乜選擇，只有一款壽司卷。由於睇過熱盤亦唔算好多，應該一輪就KO到，所以，少有哋拎咗一碟刺身一齊「些牙」，有立魚、吞拿、三文、油甘、八爪魚、鮮帶子，師傅仔啲刀功認真麻麻，但整體算幾鮮甜，啲帶子喺最正，有光澤，鮮爽甜。
中式燉湯
食完少少生冷嘅壽司，就飲盅燉湯作間場，佢哋無插牌講喺咩湯，但撈一撈，有排骨、海底椰，湯色清澈，味道清潤，飲落幾舒服。
雜錦熱盤
熱盤講明一碟就搞得掂，但拎拎吓，都成隻碟滿晒。啲豬肋骨真喺幾得喎，燒得皮脆焦香，肉質幾鬆化；燴牛尾又入晒味，而且，有淡淡酒香；啲燒西冷有少少韌，反而，堆伴菜如燒甜薯、焦糖粟子好食。
尾聲，都喺時間介紹甜品區喇，甜品安排得有少少散，先講喺正中間嘅食物枱，大部份喺大型類甜品，而且，裝飾得好有聖誕氣氛，包括純裝飾嘅薑餅屋，以及蛋糕上嘅食用裝飾，款式包括麵包布甸、奧地利百果餡批、鮮莓撻、粟子樹頭蛋糕、鵝莓薑味芝士蛋糕、黑朱古力紅桑子慕絲、聖誕果子餅、黑加倫子檸檬香草燉蛋、朱古力聖誕麵包、紅加倫子北海道奶凍、朱古力聖誕麵包共11款，睇落賣相確喺幾吸引架。
側旁喺雪糕櫃，有3款牛奶公司嘅雪糕及1款Movenpick雪糕，雖然好快被人搶晒，但見臨尾都有補貨，所以，都有試一杯。
另一邊廂，甜品仲有豆腐花、窩夫機、朱古力噴泉同小朋友好鍾意嘅軟糖。
甜品拼盤
班戟、窩夫不時都晌自助餐見到，但雞蛋仔就真喺好少有，而且，有原味及黑松露味，所以，留肚試，故此，今次碟甜品拼盤就無攞得咗瘋狂，隨意咗揀咗7款。雖然，整體啲甜品無話帶嚟好大驚喜，但質感、味道都唔失禮，黑朱古力紅桑子慕絲同紅加倫子北海道奶凍喺小弟最推介嘅兩款。
黑松露雞蛋仔伴雪糕
想食又唔食得多嘅朋友大可放心，同師傅講聲喺可以要半底嘅，即叫即做。啲雞蛋仔成品又幾重黑松露味喎，更做得外脆內軟嘅口感。伴上嘅Movenpick士多啤梨奶凍雪糕唔喺第一次食，知道喺高質好嘢嚟，再搭多個牛奶公司紅豆味雪糕，滿足晒啦。
小弟嘅甜品良伴就喺即磨咖啡，就算喺咖啡機，用豆唔差嘅話，沖出嚟嘅咖啡一樣可以好醇香。此外，檸水、檸茶，一樣可以自行搞掂。
可能本身都曾經嚟過「中西 • 環」食自助餐（前身叫IP Cafe），大概知道佢個底去到邊，心裡都無太大期望。不過，事隔多年，今晚再訪，類別、款式大致差唔多，但質素印象中就提升咗，尤其海鮮及甜品部份，以閒日價$388，利用埋飲食網站或信用卡優惠，折實三嚿半多啲，整體嘅性價比合理。加上有啲「可口可樂」藏品，增加其可觀性，由於是晚客人又唔算太多，服務可以講喺頗熨貼，3個小時用餐時間，又唔會食到好趕。
個人評分
味道：7/10
環境：7/10
服務：8/10
抵食：8/10
平均每人消費：HK$350（8折優惠券）
味道：7/10
環境：7/10
服務：8/10
抵食：8/10
平均每人消費：HK$350（8折優惠券）
餐廳資料：
中西‧環 Centre Street Kitchen
西營盤干諾道西152號港島太平洋酒店1樓
2131 5908
中西‧環 Centre Street Kitchen
西營盤干諾道西152號港島太平洋酒店1樓
2131 5908
沒有留言:
發佈留言